Bəzi saytların sensaiyapərəst rəhbərləri sanki pusquda durub, gözləyirlər ki, dolların qiyməti qalxsın və onlar bahalaşma ilə bağlı digər saytlardan qabaq "müdrikcəsinə” proqnozlar versinlər, xalqı psixoloji cəhətdən bahalaşmaya hazırlaşdırıb, onları hansısa ərzaq, geyim və s. mafiyasının canavar caynağına atsınlar. Bəli, son illərin qiymət ajiotajları, "dalğa-tufanları” göstərir ki, məhz o cür saytlardır öz təxmini-uydurma proqnozları ilə Tarif şurasını və mafioz dairələri qıcıqlandırıb, qiymətləri artırmağa təhrik edən.
Bəzi korrupsioner dairələrin xeyrinə olaraq Azərbaycanda dolların qəfildən 1,5 dəfə bahalaşdığı bu günlərdə (xoş halına milyonerlərin, milyarderləırin – var dövlətləri bir-neçə saat ərzində birdən-birə 1,5 dəfə artdı, milyonu olan yarım milyon da qazandı, milyardı olan – yarım milyard, 10 milyardı olan - əlavə 5 milyard! "Sağ olsunlar” - əl əli yudu, əl də - üzü!) xaricdən gətirilməyən, yerli malların bahalaşmayacağı haqda rəsmi məlumatlara baxmayaraq, saytların bir-çoxu "informasiya birinciliyi” iddiası ilə tələm-tələsik yalan-doğru, qeyri-dəqiq məlumatları öz səhifələrində yerləşdirib, əhali arasında çaşqınlıq, həyəcan, qorxu, sabaha ümidsizlik, hökumətə inamsızlıq yaradırlar. Bu isə tamamilə xoşagəlməz tendensiya, olduqca ciddi məsələdir.
Son günlər bəzi saytların "fəallaşaraq”, bahalaşma ilə bağlı "operativ” yaydıqları informasiyaların başlıqlarına diqqət yetirək: "Dərmanlar bahalaşacaq”,"Azərbaycanda benzinin qiymətində dəyişiklik gözlənilirmi?”, "Çörək bahalaşdı?”, "Dolların qalxması ərzağın qiymətini də kəllə-çarxa çıxardı”, "Hansı mallar, nə qədər bahalaşacaq?”, "Çörəyin qiyməti qalxdı - 50 qəpik”, "Azərbaycanda unun topdansatış qiyməti artdı”, "Telefonların qiyməti qalxdı”, "Mənzillərin qiyməti necə olacaq?”. Son günlərin bütün pessimist, bəd xəbərlərinə qarşı saytlarda yalnız bir ümidverici xəbər gözə dəyir - "Deputat: Ərzaq məhsullarının qiymət artımının qarşısını alınmalıdır”.
Son günlərdə rəsmi olaraq nə şörək, nə yumurta, nə də digər ərzaqalr bahalaşmadığı halda, bəzi saytlar mafioz qruplara xidmət edərək, onlara "informasiya dəstəyi” verərək, müxtəlif ərzaq növlərinin bahalaşdığı, öz bəd xəbərləri, bəd niyyətləri ilə alıcıların "atasını yandırmaq” üçün hətta qiymətlərin "kəllə-çarxa” çıxdığı barədə gen-bol dezinformasiyalar yayaraq, millətin qanını sovuranların daha geniş əl-qol açmalarına kömək edir, yardımçı olurlar.
Bu cür hallara bizlərdə - Azərbaycanda deyirlər "qarğa, məndə qoz var”, SSRİ vaxtında, xüsusilə ötən əsrin 30-cu illərində isə buna "iqtisadi sabotaj” deyirdilər. Və o zaman "sabotajçıları” bağışlamırdılar – ya güllələnmə verir, ya da (ən yaxşı halda!) Sibirə sürgün edirdilər. Düzdür, biz kiməsə nə Sibir, nə də qəbir arzulamırıq, ancaq süni olaraq əhali arasında həyəcan yaratmaq, təxribat törətmək tamamilə yolverilməz, bağışlanılmazdır. Bu cür hallara yol verən sayt əməkdaşları və rəhbərləri ciddi cəzalandırılmalıdırlar! Xalqın güzəranı və həyatı ilə bu cür oynamaq, ağır nəticələr verə biləcək informatik xətalar, iqtisadi təxribatlar törətmək olmaz!
Rəhman ORXAN
Xeberle.com
Xəbərdən istifadə edərkən istinad etmək vacibdir.
