"Bizim doğum evində uşaqların 10 min manata satılması və digər iddialar cəfəngiyatdır. Tibb bacısı Samirə Babayevanın psixoloji problemləri var. Ona görə də bu məlumatları yayır”.
Bunu Publika.az-a açıqlamasında Sumqayıt şəhər 1 saylı Doğum Evinin baş həkimi Sevda İsgəndərli deyib.
O, S.Babayevanın şikayətçi olduğu bütün məsələlərin dəfələrlə yoxlanıldığını, lakin heç birinin həqiqəti əks etdirmədiyini deyib.
"O qadın mənim baş həkim olmağımı istəmir. Məhz buna görə də müxtəlif vaxtlarda bu məzmunda xəbərlər yayır. O, işindəki nöqsanlara görə 3 dəfə töhmət alıb. Qanuni surətdə işdən azad edilməlidir. Lakin mən ona hörmət etmişəm. Onunla növbədə olan həkimlər, xəstələr də ondan narazıdır. Danışığını belə bilmir”.
Psixoloji problem olan birinin xəstəxanada necə işləməsinə gəldikdə, baş həkim onun işdən azad edilməsinin gündəmdə olduğunu deyib. Artıq bu məsələ ilə bağlı məhkəməyə müraciət edəcəyini bildirib.
Baş həkim uşaqların övladlığa verilənə qədər nə üçün xəstəxanada qalması məsələsinə də aydınlıq gətirib:
"Bakıdan fərqli olaraq Sumqayıtda valideynlərin imtina etdiyi uşaqların övladlığa verilməsi üçün məhkəmə qərarı verilənə qədər doğum evində qalırlar. Çünki Sumqayıt şəhərində qəyyumluq şöbəsi İcra Hakimiyyətində olduğu üçün uşaqlar övladlığa verilənə qədər burada qalmalıdır”.
Qeyd edək ki, "Musavat” Sumqayıtdakı 1 saylı Doğum Evinin tibb bacısı Samirə Babayevaya istinadən xəstəxanada yeni doğulan uşaqların 10 min manata satılması və digər qanunsuzluqlar barədə geniş yazı dərc edib.