Sumqayıtda Prezident yanında Gənclər Fondunun dəstəyi ilə "Zəka sahibləri” layihəsi çərçivəsində şahmat turniri keçirilib.
Turnirdə, ümumilikdə, 40-dək idmançı iştirak edib. Yarışın açılışı Sumqayıtın mərkəzində - ulu öndər Heydər Əliyevin abidəsi qarşısındakı parkda yerə həkk olunmuş şahmat lövhəsindəki simvolik oyunla reallaşıb.
Daha sonra Şahmat Məktəbində turnirə start verilib. Açılışda iştirak edən beynəlxalq dərəcəli qrossmeyster Zeynəb Məmmədyarova ölkəmizdə şahmata göstərilən qayğıdan danışıb, Sumqayıtda yeni möhtəşəm Şahmat Məktəbinin inşa edildiyini diqqətə çatdırıb. Tanınmış idmançı balaca şahmatçılara tövsiyələrini verib, onlara uğurlar diləyib.
Gərgin və maraqlı idman mübarizəsi şəraitində keçən turnirin yekununda qaliblər mükafatlandırılıb.