"Gənclər üçün sosioloji araşdırmalar üzrəmaster-klass” layihəsinə yekun vurulub
Azərbaycan Respublikasının Prezidenti yanında Gənclər Fondunun dəstəyi və "Simurq” Azərbaycan Mədəniyyət Assosiasiyasının təşkilatçılığı ilə həyata keçirilən "Gənclər üçün sosioloji araşdırmalar üzrə master-klass” layihəsinin bağlanış mərasimi keçirilib. Tədbirdə Azərbaycan Mədəniyyət Assosiasiyasının prezidenti, professor Fuad Məmmədov çıxış edərək layihənin əhəmiyyətindən söz açıb. O, layihə çərçivəsində sosioloji araşdırmalarda iştirak etmiş gənclərin aktivliyindən və bu istiqamətdə işlərin davam etdiriləcəyindən bəhs edib.
Azərbaycan Gənclər Fondunun nümayəndəsi Afaq Nadirli bildirib ki, Fondun həayata keçirdiyi 7 qrant müsabiqəsi artıq bitib və 2330 layihə dəstəklənib. Yanvarın 15-dək isə 8-ci qrant müsabiqəsi üzrə layihələrin qəbulu həyata keçirilib.Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzinin direktoru Asif Usubəliyev və Azərbaycan Respublikasının Prezidenti yanında Dövlət İdarəçilik Akademiyasının nümayəndəsi Asif Nəsibov çıxış edərək layihə haqında fikirlərini bölüşüblər. Qeyd olunub ki, belə layihələr gənclərimizin bu sahədəki fəaliyyətinə bir növ dəstəkdir.
Layihənin rəhbəri Tamerlan Dəmirbəyli bildirib ki, master klass təlimlərində iştirak etmiş gənclərin internet üzərindən həyata keçirdikləri sosioloji araşdırmaların nəticələri bütünlüklə layihəyə həsr olunmuş kataloqda dərc edilmişdir.
Tədbirdə layihənin işinə həsr olunmuş "Sosioloji araşdırmalar üzrə master-klass” kataloqu da ictimaiyyətə təqdim edilib. Sonda layihədə fəal iştirak etmiş gənclərə "Baku International Award” mükafatı təqdim olunub və sertifikatlar verilib.
Layihədə fəal iştirak etdiyinə görə Sumqayıtdan Əliyev Emin Baloğlan oğlu apardığı "Sumqayıt şəhərində gənclərin asudə vaxtı zamanı səmərəli istifadə etmələrinə dair ümumiləşdirilmiş sorğuya” əsasən "Baku International Award” mükafatına layiq görülərək və diplomla təltif olunub.