Fevralın 15-dən etibarən Bakı-Sumqayıt marşrutu ilə hərəkət edən elektrik qatarlarının yolda olma vaxtı 48 dəqiqədən 40 dəqiqəyə endiriləcək.

"Azərbaycan Dəmir Yolları” QSC-nin mətbuat xidmətindən AZƏRTAC-a bildirilib ki, sərnişinlərin arzu və təklifləri, eyni zamanda bu istiqamətdə sərnişin sıxlığı nəzərə alınaraq, fevral ayının 15-dən etibarən Bakı-Sumqayıt marşrutu ilə hərəkət edən elektrik qatarlarının hərəkət cədvəlində dəyişiklik ediləcək.

Bakı-Sumqayıt marşrutu ilə hərəkət edən elektrik qatarlarının sayı 12 cütədək artırılacaq, yolda olma vaxtı 48 dəqiqədən 40 dəqiqəyə endiriləcək.

Beləliklə, Bakı-Sumqayıt elektrik qatarları "Baki-sərnişin” stansiyasından saat 05:00, 05:20, 05:35, 05:50, 08:00, 08:50, 14:30, 17:25, 18:20, 18:40, 19:15 və 19:50-də, "Sumqayıt-sərnişin” stansiyasından 06:50, 07:25, 07:45, 08:00, 08:50, 09:40, 15:50, 18:20, 19:30, 20:05, 20:40 və 21:00-da yola düşəcək.

Bundan başqa, hər şənbə, bazar və bayram günləri sərnişin sıxlığının azalması nəzərə alınaraq "Bakı-sərnişin” stansiyasından saat 05:00-da, 05:20-də, 05:35-də, 18:20-də, 19:15-də, "Sumqayıt-sərnişin” stansiyasından saat 06:50-də, 07:25-də, 07:45-də, 19:30-da, 20:40-da yola düşən elektrik qatarları hərəkətdə olmayacaq.