"Şəhərimiz təmiz saxlanılmalıdır. Bunun üçün aidiyyəti qurumlar fəal iş aparmalıdırlar."
Xeberle.com məlumat verir ki, bu sözləri Sumqayıtda şəhər təsərrüfatında çalışan işçilərlə görüşdə Milli Məclisin deputatı Muxtar Babayev deyib. Media nümayəndələrinin də qatıldığı tədbirdə iştirak edən "Xeberle.com" xəbər portalının həmtəsisçisi Kamal Almuradlı isə bildirib ki, Sumqayıtın təmiz saxlanılması ilə bağlı aidiyyəti qurumlar əhali arasında təbliğat işlərinin aparılmasına və bu istiqamətdə maarifləndirmə tədbirlərinin həyata keçirilməsində maraqlı deyillər:
"İndiyədək Sumqayıt şəhər Təmizlik Departamenti əhali arasında maarifləndirici tədbirlər həyata keçirməyib, sosial aksiyalar, çarxlar hazırlamayib. Həmçinin bu istiqamətdə nə bizə, nə də Sumqayıtda fəaliyyət göstərən digər media qurumlarına, o cümlədən "Dünya" TV-yə müraciət etməyib. Təklif edirəm ki, şəhərin təmizliyinə baxan qurum sosial çarxlar hazırlasın, eləcə də təbliğat şüarları nəşr etsin."
K.Almuradlının bu təklifini millət vəkili Muxtar Babayev təqdirəlayiq addım kimi qiymətləndirdi:
"Xeberle.com-un təklifini dəstəkləyirəm. Şəhərin təmiz saxlanması üçün təbliğat materiallarından istifadə edilməlidir. Düzgün qeyd olundu ki, sosial çarx çəkilməli və geniş auditpriyaya yayılmalıdır. Yerli telekanalda bu mövzuya yer ayrılmalı, sosial şəbəkələrdə, eləcə də Xeberle.com saytında təbliğat işləri geniş şəkildə aparılmalıdır. Şəhərimizdə fəaliyyət göstərən bütün media qurumlarının potensial imkanıarından istifadə edilməlidir."
Xəbərdən istifadə edərkən istinad etmək vacibdir.
