XX əsrdə insanlığa qarşı törədilən vəhşiliklərdən biri - Xocalı soyqırımından 24 il ötür. Bu günlərdə Respublikanın hər yerində, həmçinin dünyanın bir çox ölkələrində həmin faciənin ildönümü dərin hüzr və qisas çağırışları ilə qeyd olunmaqdadır.

Sumqayıt şəhər 12 saylı tam orta məktəbdə keçirilən tədbirin əsas süjeti məhz faciə qurbanlarının qisasının alınmasına, həmçinin Vətənin işğadan azad olunmasına səsləyən çağırışlar üzərində qurulmuşdu. Tamaşaçılar sırasında məktəb kollektivi ilə yanaşı şəhər Ağsaqqallar şurasının üzvləri, valideynlər, eləcə də şəhər ziyalılarının nümayəndələri iştirak edirdilər. Tərbiyə işləri üzrə direktor müavini Arzu Qasımovanın, Uşaq Birliyi Təşkilatının rəhbəri Gülnar Əliyevanın təşkilatçılığı ilə hazırlanmış tədbirdə səslənən şeirlər, musiqi parçaları, eləcə də müəllimə Lalə Rzayevanın köməkliyi ilə hazırlanmış səhnəcik qisasa çağırışla bərabər həm də maarifləndirici xarakter daşıyırdı. Bütöv Azərbaycanın son iki əsr ərzində parçalanması, Azərbaycan torpaqlarında qondarma erməni dövlətinin yaradılması, Türkiyə və İrandan Azərbaycana ermənilərin köçürülməsi barədə video materialların, Milli qəhrəman Əlif Hacıyevə hısr olunmuş tanıtım filmin nümayişi tamaşaçılar tərəfindən böyük maraq və həyəcanla izlənildi.

Sonda çıxış edən məktəb direktoru Mətanət Abdullayeva bu cür maarifləndirici tədbirə görə təşkilatçılara minnətdarlıq etdi, Xocalı faciəsi qurbanlarını qisasının alınması hər bir Azərbaycan vətəndaşının müqəddəs borcu olduğunu bir daha vurğuladı.