Nisbətən gənc şirkət olan "Vernee” yeni yüngül "Apollo Lite” smartfonunu istifadəyə hazırlayıb.
Məlumata görə, onun daha öncəki modellərdən əsas fərqi odur ki, bu smartfonun batareyası 0-dan 75 faizədək cəmi 30 dəqiqəyə dolur.
Şirkətin yaydığı məlumatda deyilir ki, smartfonun akkumulyatorunun həcmi 3180 MA/saat təşkil edir. Yeni cihaz özünün yeni "içalatı” ilə də hər kəsi təəccübləndirə bilib. Belə ki, "Apollo Lite” 5,5 düym həcmli FullHD displeyi ilə təchiz edilib. Cihazın korpusu bir kristallı "Hello X20” sistemi əlavə olunmaqla tam olaraq alüminiumdan ibarətdir. Onun daxili yaddaşı 32 Gb, əməliyyat yaddaşı isə 4 Gb təşkil edir ki, bu da qiyməti 200 şərti ədəd qiymətində olan smartfon üçün o qədər də pis deyil. 
Bundan başqa, aparat 5 və 16 meqapikselli 2 kameraya, SİM-kart, UBS-C port, yaddaş kartı üçün slotlara malikdir. Həmçinin smartfonun arxa panelində barmaq izlərinin skaneri də mövcuddur. "Vernee Apollo Lite” "Android 6.0 Marshmallow” əməliyyat sistemi üzərində işləyir. 
Smartfonun dünya satış bazarına rəsmi çıxışı 2016-cı ilin may ayında baş tutacaq.(Lent.az)