Bu gün"Gənclər evi”ndə ümummilli lider Heydər Əliyevin anadan olmasının 93 illiyi münasibətilə Sumqayıt şəhər Gənclər və İdman Baş İdarəsinin, Sumqayıt şəhər Heydər Əliyev Mərkəzi birgə təşkilatçılığı və Mədəniyyət və Turizm idarəsinin dəstəyi ilə "Heydər Əliyev şəxsiyyəti” adlı dəyirmi masa keçirilib.
Sumqayıt şəhər Heydər Əliyev Mərkəzinin direktoru Aygün Zülfüqarlı, Sumqayıt şəhər Gənclər və İdman Baş İdarəsinin məsul işçisi Ceyhun Hüseynov və fəal gənclər çıxış edərək Dahi Öndərin xilaskarlıq, quruculuq missisiyasından, bütün sahələrin inkişafına, gənc nəslə qayğısından, misilsiz xidmətlərindən, Sumqayıta səfərlərindən və bu səfərlərin şəhərin inkişafına olan mühüm təsirlərindən söz açıblar.
O da vurğulanıb ki, prezident İlham Əliyev tərəfindən ölkəmiz siyasi sabitlik, iqtisadi yüksəliş yolu ilə hərtərəfli, dinamik inkişaf edir: "Çox sevindiricidir ki, Ümummilli Liderimiz zəngin, qüdrətli, çiçəklənən Azərbaycan qurmaq ideyalarının hər addımda təntənəsini görürük. Xüsusilə son 7 ay ərzində gözlərimizin önündə Sumqayıtda gedən sürətli inkişaf buna əyani sübutdur."
Çıxışlarda o da bildirilib ki, Ermənistan Azərbaycan Dağlıq Qarabağ münaqişəsi ilə əlaqədar cəbhədə yaranan gərginlik nəticəsində ordumuzun qazandığı zəfərlər onu göstərir ki, güclü təməl üzərində yaradılan Azərbaycan ordusu böyük qələbələr qazanmağa qadirdirdir. 
Tədbirdə təhsil və mədəniyyət sahəsində çalışan gənclərin və tələbələrin iştirak etdiyi tədbirdə ümummilli liderin həyat və fəaliyyətindən bəhs edən "Heydər Əliyev” sənədli filmi nümayiş etdirilib, dahi öndərə həsr olunan kitablar, sənədli materiallar, fotoşəkillərdən ibarət sərgi təqdim olunub.