Bəzən hansısa şəxslərin öz vəzifələrinə səhlənkar
yanaşmaları insanları get-gələ salır, onları eyni problemlə aylarla üz-üzə
qoyur. Sumqayıt şəhəri, 9-cu mikrorayonda yaşayan Hüseynovlar ailəsi də artıq
beş ildən çoxdur ki, süründürməçiliklə üzləşib. 1992-ci ildə Ağdərə uğrunda
döyüşlərdə şəhid olmuş Əlizamin Hüseynovun Sumqayıt Dövlət Texniki Kollecini
bitirmiş övladı indiyə kimi Əmək və Əhalinin Sosial Müdafiəsi Nazirliyinin Dövlət
Məşğulluq Xidmətinin Sumqayıt şəhər Məşğulluq Mərkəzinə iş üçün müraciət etsə də,
mərkəzin işçiləri onu get-gələ salıblar.
Hüseynovlar ailəsində
olaraq, şəhid ailəsinin üzləşdiyi problemə işıq salmağa çalışdıq:
"Məşğulluq mərkəzində dedilər ki, get...”
Cəmilə Hüseynova deyir ki, 2008-ci ildə
Sumqayıt Dövlət Texniki Kollecinin İqtisadiyyatın İdarə edilməsi fakültəsinə
daxil olub və 2011-ci ildə təhsilini başa vurub: "Beş ildən çoxdur ki, Əmək
və Əhalinin Sosial Müdafiəsi Nazirliyinin Dövlət Məşğulluq Xidmətinin Sumqayıt
şəhər Məşğulluq Mərkəzinə müraciət etsəm də, hər dəfə yalan vədlər verərək məni
get-gələ salırlar. Kolleci bitirdiyim il iş axtarmağa başladım. Eyni
zamanda məşğulluq mərkəzinə iş üçün müraciət etdim. Əvvəlcə mənə satıcı işini təklif
etdilər. Razılaşmadığımı görüb daha "prestijli” təklifə keçdilər. Dedilər
get, Novxanı istirahət mərkəzində ofisiant işlə”.
Müsahibimin sözlərinə
görə, son 5 ildə məşğulluq mərkəzində bir neçə rəhbər dəyişikliyi olub: "Hər
dəfə məşğulluq mərkəzinə üz tutanda mənə bu sözləri deyirlər: "Get, sonra
gələrsən”, "özümüz sənə vaxt deyəcəyik”, "biz özümüz zəng edib əlaqə
saxlayacağıq”. Bu sözləri artıq neçə ildir eşidirəm.
Lakin uzun müddət yenə
zəng etmədilər. Bir gün yenə məşğulluq mərkəzinə gedib işsizliyə görə müavinət
verilməsini xahiş etdim. Dedilər əmək kitabçanı gətir, sonra. Əgər əmək
kitabçan yoxdursa, sənə müavinət də düşmür. Cavab verdim ki, məgər siz mənə
uyğun iş verdiniz, getmədim? Belə olduqda dedilər: "Biz sənə uyğun iş
tapacağıq”. Bu vəddən də bir il ötdü”.
Bezdiyimdən bir müddət
Sumqayıt şəhər Məşğulluq Mərkəzinə müraciət etməməyi qərara aldım. Amma gördüm
ki, ailəmizin maddi sıxıntısı buna yol vermir. Buna görə də 2013-cü ildə növbəti
dəfə Sumqayıt şəhər Məşğulluq Mərkəzinə müraciət etdim. Dedilər ki, müdir işdən
çıxarılıb, onun əvəzedicisi isə sənə iş təklif edə bilməz, bir az gözlə”.
O, bir müddət gözləyib
yenidən məşğulluq mərkəzinə gedir: "Onların məni nə üçün aldatmalarının səbəbini
soruşdum. Şirin dillə dedilər: "Niyə əsəbləşirsən, get özümüz
çağıracağıq”. Ev və mobil telefonumun nömrələrini alıb dedilər ki, zəng edəcəyik.
"Dedilər ki mətbuata çıxma, sənə iş
taparıq, amma...”
Cəmilə Hüseynovanı mərkəzə qeydiyyata alsalar da, neçə illərdir bunun heç bir faydası olmur: "Sumqayıt şəhər Məşğulluq Mərkəzinin rəhbəri İlham Hüseynov əvvəllər oranın işçisi olub. Az müddət əvvəl müdir vəzifəsinə
gətirilib. İki aya yaxın müddətdə də o, məni süründürdü, get-gələ saldı.
Bu yaxınlarda eşitdik
ki, məşğulluq mərkəzindən zavodlara işə göndərirlər. Sumqayıt şəhər Məşğulluq Mərkəzinə
növbəti dəfə müraciət etdim. Cavab verdilər ki, bu iş ancaq kişilər üçündür.
Axır bir "iş” tapıldı. Mərkəzdən zavoda zəng edib danışdılar. Mənə isə
cavab verdilər ki, orada satış meneceri vəzifəsi boşdur. Zavoda gedəndə mənə
dedilər ki, gəl paltar tik, dərzilik et. Əgər iş paltar tikməkdən ibarət idisə,
niyə məni məşğulluq mərkəzindən satış meneceri adıyla aldadıb ora göndərirdilər?
Sonuncu dəfə Sumqayıt
şəhər Məşğulluq Mərkəzinin rəhbəri İlham Hüseynovun qəbulunda iki həftə əvvəl
oldum. Mənə vəd verib dedi ki, get, 2 həftə gözlə, özüm zəng edəcəm. İki həftədən
çox vaxt keçsə də, bu günə kimi zəng etməyiblər. Bu da növbəti yalan vədlərdir.
İlham müəllim deyir
ki, sən iş tap, mən işə düzəlməyə sənə pul tapacam. Cavab verdim ki, İlham müəllim,
iş tapsaydım, daha sizə niyə ağız açırdım?
"Şəhid qızını ki...”
Ona məşğulluq mərkəzində trikotaj fabrikindədərzi, satıcı işi təklif olunub: "Öyrəndim ki, trikotajda da neçə aydır işçilərin maaşlarını kəsib vermirlər. Məşğulluq mərkəzi limonad sexində də
mənə "iş” tapmışdı. Hələ limonad sexində də məndən ingilis və rus dillərini
bilib-bilməməyimi soruşurlar. Limonad sexindəki işin ingilis və ya rus dilini
bilməyə nə dəxli var?
Sonuncu dəfə mərkəzdə
olanda işsizlərdən biri mətbuata şikayət etmişdi. Arxivdə həmin şəxsin sənədlərini
axtarırdılar ki, məşğulluq mərkəzinə çağırıb mətbuata şikayət etdiyinə görə onu
hədələsinlər. Dedim niyə insanları get-gələ salırsınız? Mən də mətbuata şikayət
edəcəm. Belə olduqda dedilər ki, şikayət etmə, sənə bir iş tapacağıq. Beləcə,
başımın altına yastıq qoydular”.
Mərkəzin sədri İlham
Hüseynov üç həftə bundan əvvəl bütün əlaqə telefonlarımız, ünvanımı yazıb
götürdü. Dedi: "maksimum iki həftəyə zəng edəcəm”. Artıq 3 həftədən çox
vaxt keçir. Bundan əvvəl də belə vədlər verib. Hər dəfə qəbuluna gedəndə deyir
ki, get, yaxşı iş olanda mən sənə zəng edəcəm.
"Deyirlər: "Niyə yuxarılara müraciət
edirsən, onsuzda məktublar axırda bizə göndərilir”
Sonuncu dəfə Sumqayıtda əmək yarmarkası keçiriləndə onu da çağırıblar:
"Son əmək yarmarkası məşğulluq mərkəzində ötən il keçirildi.
Orada təklif olunan iş ofisiantliq və digər işlər idi. Əgər belə işdirsə, onda
məşğulluq mərkəzinə nə üçün müraciət edirəm?
Mən yüksək maaşlı iş
istəmirəm, ixtisasıma uyğun, heç olmasa kompüterə aid iş axtarıram. Heç olmasa
200-250 manatlıq iş olsun. Beş ildir məni işsiz qoyublar”.
Bir müddət əvvəl
işsiz qalmağımla bağlı aidiyyəti orqanlara və millət vəkillərindən birinə
müraciət etdim. Məktubum icra hakimiyyətinə göndərildi. Oradan isə məşğulluq mərkəzinə.
Məşğulluq Mərkəzindən isə bildirdilər ki, onsuz da məktublar axırda bizə göndərilir,
nahaq müraciət edirsiniz. Səlim Müslümov bir neçə ay əvvəl Xızıya gəldi. Bircə
dəfə demədilər ki, get yazıl cənab nazirin qəbuluna. Heç olmasa bunu edə bilərdilər”
"Nə əmisi var, nə
dayısı...”
Cəmilə Hüseynovanən babası,
76 yaşlı Süleyman Hüseynov da vədlərlə aldadılıb: "Təkcə ötən il 5 ay iki gündən bir məşğulluq mərkəzinə getdim. Onda əvvəlki müdir də yalan vədlər verdi. Amma hər dəfə
şirin vədlər verib aldadırdılar. İl yarıma qədər müraciət etdim, rəhbərlikdən
bir dəfə maraqlanıb demədilər ki, gəl görək nə istəyirsən.
Cəmilə Hüseynovanın
anası Vəfa Hüseynova deyir ki, bağçada tərbiyəçi işləyərək, 150 manat maaş
alır: "Bu maaşla özümü və qızımı necə dolandırım? Oğlan olsaydı, gedib
avtoyumada yuyucu, fəhlə işləyər, daş daşıyar, pul qazanardı. Qızımı fəhlə,
avtoyuyucu işlərinə necə göndərim?
İndiki müdir İlham müəllimin
qəbuluna isə 2 ay gedib-gəldim. Dedi
ki, sən bura niyə gəlirsən? Qızları gətir. Cavab verdim ki, mənə müsbət cavab
verilsə, onlar da gələr. İlham müəllim deyir arxayın ol, bir həftədən sonra gəl,
həll edərik. Bir həftədən sonra gedəndə isə onu tapmırdım. Beləcə aylarla ora
ayaq döydüm.
Hər dəfə icra başçısının qəbuluna gedəndə məşğulluq
mərkəzinin işçiləri orada olur. Komissiya üzvləri nə üçün gəldiyimi soruşurlar.
Sonuncu dəfə apreldə getdim. Gəlişimin səbəblərini soruşdular. Mən də nə üçün gəldiyimi
dedim. Onda məşğulluq mərkəzi sədrinin müavini Cəfər qəbula yazılmağımı
qoymadı. Dedilər gələrsiniz məşğulluğa, özümüz həll edərik. Başçının qəbuluna
yazılmayın. Amma yenə kömək etmədilər.
Nəvəm Cəmilənin məndən və qızımdan başqa heç
kimi yoxdur. Nə əmisi var, nə dayısı. Atası sağ olsaydı, bəlkə də işləməyə
ehtiyacı olmazdı.
Bir dəfə
gedib xeyli yalvardım. Dedilər dayı yalvarma, ştat dolub”.
Anar Tağıyev,
Fotolar Elçin Muradındır
publika.az