"IB Club Sumqayıt”, Sumqayıt Dövlət Universitetinin Karyera Mərkəzi və Ekologiya və Təbiətdən İstifadə kafedrasının birgə təşkilatçılığı ilə 23 May - Ekologiya və Təbii Sərvətlər Nazirliyi işçilərinin peşə bayramı münasibətilə Sumqayıt Dövlət Universitetində elmi-praktik konfrans keçirilib.

Birlikdən AZƏRTAC-a bildiriblər ki, konfransı açan kafedranın müdiri Rəhilə Əhmədova ekoloqları peşə bayramı münasibətilə təbrik edib.

Sonra Ekologiya və Təbii Sərvətlər Nazirliyinin 4 saylı ərazi idarəsinin nümayəndəsi Elmar Musayev çıxış edərək, ölkədə aparılan ekoloji siyasətdən söz açıb, qəbul olunan dövlət proqramlarının əhəmiyyətindən danışıb.

Sumqayıt Ekoloji Tərbiyə və Təcrübəçilik Mərkəzinin rəhbəri Emilya Səfərəliyeva çıxışında Milli Təhsil Konsepsiyasında gənc nəslin ekoloji təhsil və tərbiyəsinə xüsusi diqqət yetirildiyini vurğulayıb. O, ekoloji maarifçiliyə böyük ehtiyac olduğunu qeyd edərək, ekoloji biliklərə yiyələnməyin, təhsilin ayrı-ayrı pillələrində ekoloji təlimin həyata keçirilməsinin vacibliyini vurğulayıb.

Daha sonra konfrans iştirakçıları təqdimatlarla çıxış ediblər. Bildirilib ki, təbiətə qayğıkeş münasibət, ekoloji təfəkkürün yaranması əhalidə və gənc nəsildə ekoloji tərbiyə və mədəniyyətin hansı səviyyədə olmasından asılıdır. Azərbaycan dövlət müstəqilliyini bərpa etdikdən sonra ətraf mühitin mühafizəsi və ekoloji təhsillə bağlı qəbul edilmiş ekoloji qanun və qərarlar bu problemin həllində atılmış mühüm addımlardır.

Konfransda "IB Club Sumqayıt”ın layihələr üzrə meneceri Rauf Əliyev, Sumqayıt Dövlət Universitetinin Karyera Mərkəzinin rəhbəri Zahid Bünyadov, Ekologiya və Təbii Sərvətlər Nazirliyinin 4 saylı ərazi idarəsinin rəsmiləri və Ekologiya və Təbiətdən İstifadə kafedrasının tələbə və müəllim heyəti iştirak edib.