Türk Əməkdaşlıq və Koordinasiya Agentliyinin (TİKA) sədr müavini Ali Maskan mayın 25-də Sumqayıtda Qubadlı rayonundan olan məcburi köçkünlərin məskunlaşdığı "Şəfa” sanatoriyasının mərasim evində sakinlərlə görüşüb. Qeyd edək ki, mərasim evinin və idman zalının avadanlıqlarının təchizatını, "Şəfa” sanatoriyasında həyətyanı sahənin və ətraf ərazilərin abadlaşdırılması işlərini TİKA həyat keçirib.
AZƏRTAC xəbər verir ki, görüşdə Qubadlı Rayon İcra Hakimiyyətinin başçısı Malik İsaqov, idarə, müəssisə və təşkilat rəhbərləri, rayon sakinləri, ictimaiyyət nümayəndələri iştirak ediblər.
Qubadlı Rayon İcra Hakimiyyətinin başçısı Malik İsaqov Türkiyə-Azərbaycan dostluq münasibətlərindən bəhs edərək bildirib ki, iki ölkənin əməkdaşlığı nəinki regionun, bütövlükdə, dünyanın enerji təhlükəsizliyinin təminatında həlledici rol oynamaqdadır. Son illərdə ölkələrimiz arasında münasibətlərin dinamizminin möhkəmlənərək keyfiyyətcə yeni mərhələyə qədəm qoyması qarşılıqlı əməkdaşlıq əlaqələrinin genişlənməsinə təkan verib.
Sonra TİKA-nın sədr müavini Ali Maskan çıxış edərək, iki qardaş ölkənin daim bir-birinə dəstək ifadə etdiyini vurğulayıb. O qeyd edib ki, xüsusilə beynəlxalq münasibətlər müstəvisində iki dövlətin bir-birini ardıcıl və davamlı dəstəkləməsi olduqca təqdirəlayiqdir. Azərbaycan ilə Türkiyə arasındakı siyasi, iqtisadi əlaqələr, elm, təhsil, mədəniyyət və digər sahələrdəki əməkdaşlıq hazırda ən yüksək mərhələdədir.
Rayon ağsaqqalları adından çıxış edən Yusif İsayev, Əvəz Muxtarov görülən işlərdən, rayon sakinləri, gənclər və idmançılar üçün yaradılan şəraitdən danışaraq, onlara göstərilən diqqət və qayğıya görə ölkə rəhbərliyinə, Türk Əməkdaşlıq və Koordinasiya Agentliyinə minnətdarlıqlarını bildiriblər.
Xəbərdən istifadə edərkən istinad etmək vacibdir.