2016-cı il Gəncə Avropa Gənclər Paytaxtı proqramı çərçivəsində "İcma inkişafında gənclərin rolu" adlı layihəyə start veriləcək. 09-15 Avqust tarixlərində olacaq bu layihə Azərbaycan Respublikası Prezidenti yanında Gənclər Fondunun maliyyə dəstəyi, Gəncə şəhər İcra Hakimiyyətinin təşkilatı dəstəyi ilə "Gəncə Avropa Gənclər Paytaxt 2016” İB tərəfindən həyata keçiriləcək. Təlim kursunun əsas məqsədi gənclərin qarşılaşdıqları çətinliklərin müzakirəsi, bunun həll yollarının seçilməsi, cəmiyyətdə fəal iştirakına görə onları həvəsləndirmək və ehtiyaclarını tapmaq, həmçinin Avropa və Azərbaycanın ətraf regionlarında yaşayan gənclər arasında şəbəkələşmənin qurulmasından ibarətdir. Beynəlxalq layihəyə 10 avropa ölkəsindən ümumilikdə 10 nəfər xarici, 1 nəfər beynəlxalq təşkilatlarda bu sahə üzrə çalışan beynəlxalq ekspert və 10 nəfər yerli iştirakçının qatılması planlaşdırılır. Avropadan gəlmiş iştirakçılar həçinin Azərbaycanın zəngin tarixi, mədəniyyəti və təbiəti ilə də tanış olmaq şansı əldə edəcəklər.