"Son zamanlar məişət zəminində boşanmaların sayı artmaqdadır. Çox vaxt ailələr özləri boşanmaq üçün müraciət etmirlər. Valideynlər onların yerinə qərar qəbul edir və övladlarını buna təhrik edirlər”.
Bu sözləri Xeberle.com-a açıqlamasında "Qadın Təşəbbüsü və Sosial Problemlərin Həllinə Yardım” İctimai Birliyinin sədri, ekspert Zenfira Mustafayeva deyib. O, qeyd edib ki, belə hərəkətlərə yol verməklə bəzi valideynlər sanki övladlarının yenidən ailə qurması üçün yarışa giriblər: "Balakəndən yaşlı bir kişi gəlib deyir ki, gəlinimi analıqdan necə məhrum edə bilərəm? Sual verirəm, uşaqlara necə baxcaqsınız? Cavabında bildirir ki, oğlumu başqasıyla evləndirəcəm, o da baxacaq”.
Ekspert açıqlamasında onu da bildirib ki, ailələrin dağılmasında qayınanaların da rolu az deyil. Onun sözlərinə görə, bir sıra ailələrdə qayınanalar gənc ailələrin dağılmasına səbəb olurlar: "Bizim mərkəzə gənclərdən biri müraciət edərək bildirir ki, qayınanam yaşamağa imkan vermir. Bütün işlərimizə müdaxilə edir. edir. Hər xırda söhbətdən sonra qızını götürüb aparır. Müdaxilələr olmasa rahat yaşayarıq”.
Bu kimi problemlərdən danışan Z. Mustafayeva vurğulayıb ki, valideynlər yeni qurulmuş ailələrə dəstək olmalı və ailənin möhkəmliyinin təminatçısı kimi çıxış etməlidirlər: "Hər kiçik qüsura görə onları qınamaq yox, məsləhətçiləri və yolgöstrərənləri olmaq lazımdır. Əgər qayınana gəlini öz qızından ayırırsa və ya kürəkənə yad gözlə baxırsa, onların kiçik qüsuru belə faciəyə çevriləcək”.
Birlik sədri deyir ki, mülk üstündə müraciət edənlər də əsasən valideynlərdir: "Mənim evim, mənim torpağım, mənim əşyalarım və s. Məgər bu topladıqlarınız övladlarınız xoşbəxtliyi üçün deyilmi?! Qayınana öz eqosunu daim ortaya qoyur: böyütmüşəm, adam eləmişəm, mənim oğlumdur və ancaq bu evdə mənim sözüm keçərlidir. Başa düşmək lazımdır ki, heç kim heç kimin qarşısında borclu deyil”.
O, cəmiyyətdə mövcud olan daha bir təhlükəli tendensiyaya toxunub: "Həyat yoldaşını borcdan xilas etmək üçün bir xanım yaxın rəfiqəsindən borc pul götürür. Lakin həyat yoldaşı vaxtında pulu qaytarmır və qadını cəzalandırır. Kişi körpə uşaqla onu evə buraxmır, deyir özün necə istəyirsən pulu qaytararsan. Sonra da namusdan, qeyrtədən, vicdandan danışırıq. Cəmiyyətimizdə belə adamlar da az deyil”, - deyə Zenfira xanım fikrinə əlavə edib.
R. Zeynallı
Xeberle.com

Xəbərdən istifadə edərkən istinad etmək vacibdir.