Aprel döyüşlərində şəhid olan Zəngilan rayonundan həqiqi hərbi xidmətə yollanmış Müşfiq Arif oğlu Orucovun ailəsi çətin vəziyyətdə yaşayır. Zəngilan rayonundan məcburi köçkün düşmüş şəhidin ailəsi artıq uzun müddətdir ki, Bakı şəhər, Xətai rayonunda H.Z.Tağıyev adına kombinatın uçuq, köhnə və acınacaqlı durumda olan birotaqlı evdə məskunlaşıb. Müşfiq Orucov aprel döyüşlərində erməni qəsbkarlarının hücümunu dəf etmək üçün qəhrəmancasına şəhid olsa da, hazırda onun ailəsinin mənzil şəraiti, maddi durumları ilə heç bir qurum maraqlanmır. Şəhidin anası Aygül Orucova xeberle.com-a bu haqda məlumat verərək bildirib ki, aprel ayında bir sıra qurumlar arada gəlib gedirdi, indi isə onları heç yada salan yoxdur. Bir neçə dəfə maddi durumları və məskunlaşdıqları yerin acınacaqlı olması barədə aidiyyəti qurumlara müraciət etdiklərini deyən şəhidin anası bildirir ki, bunun heç bir əhəmiyyəti olmayıb: "Heç bir maddi yardım, diqqət və qayğı mənim mərd, igid, savadlı oğlumu geri qaytara bilməz. Amma Müşfiq vətən, müqəddəs torpaqlarımız uğrunda canından keçib. Təbii ki, müharibə edən ölkədə şəhidin olması normal haldır. Amma bəzi icra orqanlarının şəhid ailələrinə diqqətsiz yanaşması, onlarla maraqlanmaması bizi də çox üzür. Mənim yaşadığım şəraiti görürsünüz. Uzun illərdir burda məskunlaşmışıq. Oğlumun yad eləməyə, bizə təsəlli verməyə gələnləri belə evin darısqal, bərbad olması səbəbindən məcburən küçədə qarşılamalı oluruq. Bu yaxınlarda Heydər Əliyev Fonduna heç olmasa başqa bir yerdə bundan bir az normal şəraitli mənzillə təmin olunmağımız barədə müraciət etdik. Getdik qəbula, yazılı məktub da verdik. Onlar da bizim məktubu hazırda məskunlaşdığımız Xətai Rayon İcra Hakimiyyətinə göndərərək lazımi tədbirlər görmələrini tapşırdılar. Daha sonra bizi icra hakimiyyətinə çağırıb, sözügedən məsələnin onlara aid olmadığını deyərək bizi yola saldılar. Şəhid ailəsinə aidiyyəti orqanlardan belə münasibətin göstərilməsi təəssüf doğurur. Mən bir daha aidiyyəti qurumlardan, ölkənin birinci xanımı, Heydər Əliyev Fondunun prezidenti Mehriban xanım Əliyevaya müraciət edirəm. Bilirəm ki, o, daim ehtiyacı olanların, qaçqın və məcburi köçkünlərin, şəhid ailələrinin yanında olub, onlara daim köməklik edib. Ümid edirəm ki, hörmətli Mehriban xanım bu dəfə də bizi eşidib səsimizə səs verəcək”.
Qeyd edək ki, Müşfiq Orucov aprel döyüşlərində Ermənistan Azərbaycan arasında gedən döyüşlərdə qəhrəmancasına şəhid olub. O, Azərbaycan Texniki Universitetin məzunu idi. Ölümündən sonra Ali Baş Komandan, prezident İlham Əliyev tərəfindən "İgidliyə görə” medalı ilə təltif olunub.
Xəbərdən istifadə edərkən istinad etmək vacibdir.