Milli Məclisin Əmək və sosial siyasət komitəsinin sədri Hadı Rəcəblinin şəhid ailələrinə 100 min manatın verilməsi ilə bağlı səsləndirdiyi fikirlər etiraza səbəb olub.
Belə ki, onun "şəhid ailələrinə verilən birdəfəlik müavinətin 10 dəfə artırılması barədə təkliflərin populizmdir” deməsi, cəmiyyətdə narazılıqla qarşılanıb.
Tanınmış jurnalist, aprel döyüşlərindən sonra bütün şəhid ailərinin evlərinə gedib reportajlar hazırlayan Aidə Eyvazova BakıPost-a açıqlamasında deputatın səsləndirdiyi fikirlərə sərt münasibət bildirib.
Jurnalist deputatın fikirlərin əksinə olaraq şəhid ailələrinə daha çox yardımların edilməsinin vacibliyini söyləyib: "Deputat Əflatun Amaşov tez-tez şəhid ailələrinə baş çəkdiyi üçün onların problemləri haqda bilir. Onun şəhid ailələrinə 100 min manat verilməsi təklifinə sevindim. Çünki həmin şəhid ailələrini apreldən indiyə kimi gəzirəm. O, şəhidlərin çoxu ailələrinin son ümidi, son gümanı olub. Dövlət onlara birdəfəlik 11 min manat vəsait ayırmışdı. Hər ay isə ailələrə 110 manat təqaüd verilir. Şəhid analarının və atalarının çoxu övladları şəhid olandan sonra xəstə düşüblər. O ailələrdən gedən oğulların qiyməti 100 min yox, 1 milyon, 5 milyon dəyərindədir.
Ermənilər polkovnik-leytenant Raquf Orucovun başına milyonlarla pul qoymuşdu. Hətta ermənilər bizim şəhid olan elə kəşfiyyatçılarımız var ki, onlarında başlarına böyük məbləğlərdə pul qoyub. Belə çıxır ki, ermənilər qəhrəmanlarımızı bizdən daha çox dəyərləndirir.
Biz şəhidlərimizə bu qədərmi qiymət vermirik? Onların qiymətini 100 mindən aşağı tuturuq? Şəhid ailələrinin hansının övladı yüksək vəzifələrdə çalışır? 1992-ci ildən bəri hansı şəhidin oğlu deputat seçilib və ya hansısa komitələrdə işlə təmin olunub?
Onların sayı barmaqla sayılası dərəcədə çox azdır. Hətta onların sayı 10 nəfər belə olmaz. Axı onların qanı hesabına dövlətimiz Azərbaycan oldu.
Şəhidlərimiz bizə 25 il həsrətində olduğumuz qələbə sevincini yaşatdı. Bunu necə inkar etmək olar? Hörmətli Hadı müəllim o şəhidlərin hansının qapısını döyüb onların necə yaşadıqlarını soruşub? Məsələn, Gəncədəki hərbi məhəllədə ailəsi yaşayan şəhid İnqilab Quliyevin oğlanları atasına oxşayan hərbiçi formada olan birini görən kimi onun qabağına qaçırlar. Şəhid ailələrinə 100 min verilməsin deyənlər bu dərdləri bilirmi? Şəhid uşaqlarına 100 min yox, ata lazımdır. Hazırkı vəziyyətdə isə o uşağa 100 min də unutdura bilməz”.
A.Eyvazova hesab edir ki, hələlik şəhid ailələrinə 100 min yox, 50 min manat belə verilə bilər:"Hadı bəy şəhid ailələrinə 100 min manatın verilməyin mümkün olmadığını deyir. Niyə olmur axı? Azərbaycan qüdrətli ölkədir. Azərbaycanın güclü fondu var. Dövlətimiz istəsə şəhidinə o pulu verə bilər. Hələlik 100 min olmasa da, 50 min manat verilə bilər. Ya da 100 mini birdəfəlik olmasa da, az-az ödənilə bilər. Hazırda evsiz olan xeyli sayda şəhid ailələri var. Əksər şəhid ailələri isə 15 kvadratlıq evdə yaşayır. Aprel döyüşlərində şəhid olan Müşfiq Orucovun ailəsi yeri daş döşəmə olan birotaqlı yataqxanada yaşayır. Bu şəhid ailələri neyləsin? Bütün bunlara baxmayaraq, onlar nəsə istəməyə utanırlar. Bayrağı, vətəni hər şeydən uca tuturlar. Axı cənab prezident İlham Əliyev hər dəfəsində şəhid ailələrinə qayğının artırılmasını deyir. Əmr verilibsə, siz də oturub işləyin. Elə layihələr hazırlayın ki, şəhid ailələrinin vəziyyəti günü-gündən yaxşılaşsın”.
Qeyd edək ki, Milli Məclisin deputatları Aydın Mirzəzadə və Əflatun Amaşov şəhid ailələrinə birdəfəlik müavinətin miqdarının 10 dəfə artırılaraq 100 min manat verilməsinı təklif edib. Hadı Rəcəbli isə həmkarlarının səsləndirdiyi bu təklifə etiraz edərək, bunun mümkünsüz olduğunu deyib.
Xəbərdən istifadə edərkən istinad etmək vacibdir.
