Siqaretlə mübarizə tədbirləri çərçivəsində bir çox Avropa ölkəsində olduğu kimi Azərbaycanda da tütündən imtina otaqları yaradılır. Gələn aydan fəaliyyətə başlayacaq, xüsusi otaqlara belə hər bir siqaret aludəçisi müraciət edə, dəstək ala bilər.
Elvin Teymurovun 18 yaşı var. Lakin artıq o, 5 ildir ki, siqaret çəkir. Və beləliklə, tütündən asılılıq yaranır. Elvin yeniyetmə yaşlarında alışdığı pis vərdişdən dəfələrlə xilas olmağa cəhd edib. Lakin iradəsinə qalib gələ bilməyib. Tütündən imtina kabinetlərinin fəaliyyətə başlayacağı ilə bağlı xəbərlər isə onda yenidən ümid yaradıb. Siqaretin insan sağlamlığına zərərli olması barədə hətta onun qutusunun üzərində belə yazılsa da bu onun istifadəçilərinin sayına təsir etmir. Son illərin statistikası göstərir ki, siqaretlə tanışlığın yaş həddi də azalır. Azərbaycanda əhalinin 34 faizinin tütündən asılılığı var. Nəzərə alaq ki, bu rəsmi məlumatdır. Siqaretlə mübarizə tədbirləri çərçivəsində Səhiyyə Nazirliyi İctimai Səhiyyə və İslahatlar Mərkəzinin ambulator şöbəsinin nəzdində əhali üçün tütündən imtina otaqları və qaynar xətt fəaliyyətə başlayacaq. Noyabrdan vətəndaşların ixtiyarında olacaq bu xidmətlər pulsuzdur.
GÜNAY MƏMMƏDOVA
Xəbərdən istifadə edərkən istinad etmək vacibdir.