Azərbaycan Respublikasının Prezidenti yanında Gənclər Fondunun maliyyə dəstəyi ilə 8-ci qrant müsabiqəsi çərçivəsində qalib olmuş "Uğurlu karyera işgüzar yazışmalardan başlayır"  adlı layihə icrası  Bakı, Gəncə və Sumqayıt şəhərlərində uğurla yekunlaşmışdır.
İnformasiya texnologiyalarının dayanmadan inkişaf etdiyi bir dövrdə insanlar məsafələrdən asılı olmayaraq bir-birlərini görmədən ünsiyyətdə olur, işgüzar münasibətlər qururlar. Bu halda onlar barədə yaranan ilkin təəssürat və nüfuz yazı tərzlərindən, fikirlərini sözlərə çevirmə bacarığından asılı olur. İşgüzar aləmdə peşəkar yazı tərzi vəzifəsindən asılı olmayaraq hər kəs üçün eyni dərəcədə önəmlidir. Peşəkar işgüzar yazışma bacarığına yiyələnməklə gənclər fikirlərinə inam yaradır, özləri haqqında peşəkar fikir formalaşdırırlar. Hal- hazırda işgüzar fəaliyyətin əsas hissəsini yazışmalar təşkil edir. Artıq qəbul olunmuş haldır ki, bir dəfə görüşüb müəyyən məsələləri müzakirə etdikdən sonra digər məqamlar yazışmalar əsasında təsdiq edilir. Layihənin əsas məqsədi ali və orta ixtisas müəssisələrini bitirmiş və ya son kurslarda olan gənclərin işgüzar yazışma bacarıqlarını inkişaf etdirmək, onları işgüzar yazışma formalarının müxtəlif formaları haqqında məlumatlandırmaqdır. Layihə Bakı, Sumqayıt, Gəncə şəhərlərində həyata keçirilmişdir. Layihədə 18- 30 yaşda olan gənclər iştirak etmişdir.
"Uğurlu karyera işgüzar yazışmalardan başlayır" adlı layihə çərçivəsində gənclər tərəfindən gələcəkdə iş prosesində qarşılaşdıqları vəziyyətlərə uyğun işgüzar yazışma nümunələri nümayiş etdirilmiş, bu da öz növbəsində onların gələcək işlərində yazılı iş vərdişlərinə yiyələnmələrinə səbəb olacaqdır. İşgüzar yazışmalarla yanaşı, əməli yazı nümunələri, həm dövlət, həm də özəl sektorda gündəlik işin ayrılmaz tərkib hissəsidir. İşgüzar yazışmalarla bağlı həm informativ, həm də praktiki vasitələrdən istifadə edilərək layihədə qoydulan problemin həllinə nail olmuş olunmuşdur. Qeyd edək ki, bu tipli layihə üzrə təlimlər davamlı şəkildə əsasən özəl şirkətlər tərəfindən həyata keçirilib, bundan əvvəlki qrant müsabiqələrində bu mövzuda layihə olmayıb. Layihənin lazımlılığını nəzərə alaraq davamlı şəkildə gələcəkdə Azərbaycanın bütün şəhər və rayonlarında keçirilməsi planlaşdırılır. 

Xəbərdən istifadə edərkən istinad etmək vacibdir.