Mingəçevir Media Mərkəzində Mingəçevir
Valideynlər Assosiasiyasının Çexiya ("Transitions”) və Polşadan ("Linking
Media”) olan tərəfdaşları ilə birgə keçirdiyi açıq məlumatlara dair təlimlərin növbəti
hissəsi başa çatıb. Auditoriyanı
açıq məlumatlarla tanış etmək və gələcəkdə onlara məlumatları hamının başa
düşəcəyi şəkildə təqdim etməyi öyrətmək
layihənin başlıca məqsədidir.
Avropa Birliyinin maliyyələşdirdiyi və BMT-nin
İnkişaf Proqramı tərəfindən həyata keçirilən "Əhalinin həssas qruplarının
sosial-iqtisadi hüquqlarının təmin olunmasında vətəndaş cəmiyyətinin rolunun
gücləndirilməsi” layihəsi çərçivəsində reallaşdırılan təlimdə QHT,
dövlət və KİV nümayəndələri iştirak edib.
Mingəçevir
Valideynlər Assosiasiyasının prezidenti, eləcə də
layihə rəhbəri Fərman
Nəbiyevin sözlərinə görə, bu təlimlərə Bakıdan və Azərbaycanın digər
bölgələrindən QHT, dövlət və KİV təmsilçiləri qatılıb: "3 gün
ərzində onlar açıq məlumatlar konsepsiyasını müzakirə edib, Belorus,
Avropa Birliyi və dünya KİV-lərinin, QHT və dövlət orqanlarının açıq
məlumatlarla işləmə təcrübəsini öyrənib. İştirakçılar açıq məlumat
portalları, məlumat mənbələri, vizuallaşdırma alətləri ilə tanış olub,
xəritələr üzərində işləməyi öyrəniblər”.
F.Nəbiyevin
sözlərinə görə, maraq doğuran təlim ardıcıl olaraq 2017-ci ildə də davam
etdiriləcək. "Proqramın nəticəsi olaraq data jurnalistikasına dair saytın
hazırlanması da nəzərdə tutulub."
Nəzərə
çatdıraq ki, təlimləri izləyən və təlimlərin gedişindən məmnun qalan BMTİP əməkdaşları əmin olduqlarını bildiriblər ki, proqramın uğurla
icrası Azərbaycanın hökümət, QHT və KİV nümayəndələrinə əhali ilə daha
rahat işləmək imkanı yaradacaq.
Qeyd
edək ki, təlimləri "Linking Media” təşkilatının nümayəndəsi, media
üzrə mütəxəssis Lyaksey Lyavonçik idarə edib.
Xəbərdən istifadə edərkən istinad etmək vacibdir.