Türkiyənin İzmir şəhərində yaşayan soydaşımız, jurnalist Nigar Börek orada müalicə alan imkansız bir azərbaycanlı ailəsinin uşaqlarının "səsi olub”. N.Börek sosial şəbəkədə ailənin 2 uşağının ağır xəstə olduğunu və hazırda Ege Universitetində müalicə aldığını yazıb. O, uşaqlar üçün kömək kampaniyasının başlayaraq onların hesab nömrələrini də qeyd edib. Nəticədə valideynlər xoş bir xəbər alıblar. Bu çağırışa İzmirdə fəaliyyət göstərən Azərbaycan Mədəniyyət və Həmrəylik Dərnəyinin sədri, habelə Türkiyə Azərbaycan Dərnəkləri Federasiyası mətbuat katibinin köməkçisi Mülazim Kardelen Paşa səs verib. O, dünən xəstəxanaya gələrək uşaqların valideynləri ilə görüşüb, uşaqları ziyarət edib. Azərbaycanəsilli dərnək rəhbəri uşaqların müalicəsinə imkanı daxilində kömək edəcəyinə söz verib. Mülazim Kardelen Paşa Xeberle.com-a söyləyib ki, uşaqlar bizim gələcəyimizdir. Əlimizdə imkanlar varsa, niyə də dəyərləndirməyək?! Biz 2 dövlət bir millətik! İmkan düşdükcə acıları paylaşsaq azalar, sevincləri paylaşsaq, çoxalar. Odur ki, bu olaya diqqət çəkən şəxslərə də təşəkkür edirəm.
Uşağın valideynləri öz növbəsində Mülazim Paşaya dərin minnətdarlıq ediblər. Ailənin yaxınları ümidvar olduqlarını bildiriblər ki, İzmirdə köməksiz bir Azərbaycan ailəsinə həyan olan Mülazim Kardelen Paşanın bu xeyirxah addımı digər dərnək başçıları və imkanı olan şəxslər tərəfindən də qəbul olunacaq. Onlar da Mülazim bəyin davamçısı olaraq bu ailəni ziyarət edərək öz kömək əlini bu ailəyə uzadacaqlar.
Xeberle.com
Xəbərdən istifadə edərkən istinad etmək vacibdir.
