İzmirin Ege Universitetində müalicə alan Aytən və Coşqun Ömərli qardaş və bacılarına maddi yardım etmək üçün burada yaşayan azərbaycanlıların və şəhər sakinlərinin bir araya gələrək müəyyən yardım kampaniyasına başladığını yazmışdıq. Habelə bununla bağlı xeyriyyə konserti verilməsi haqqında da məlumat vermişdik. Qeyd edək ki, xeyriyyə konserti dekabrın 18-də saat 15:00-da İzmir Qarabağlar bələdiyyəsinin dəstəyi ilə Qarabağlar bələdiyyəsi ərazisində keçiriləcək. Sevindirici haldır ki, hazırda Türkiyənin tanınmış sənətçisi, ümumiliklə Azərbaycan türklərini təmsil edən Erdal Baydar da bu təşəbbüsə qoşulub. O, konsertin solisti olaraq səhnədə pulsuz mahnılar oxuyaraq aksiyaya öz dəstəyini verəcək. Erdal Baydar Xeberle.com-a verdiyi açıqlamasında söyləyib ki, bu, onun insanlıq borcudur: "O, körpələrin yerində bizim də uşaqlarımız ola bilərdi. Ona görə də əlimizdən gələn nə varsa, yardım etməyə hazırıq", - deyə sənətçi bildirib.
Xatırladaq ki, Erdal Baydar hazırda Avropada yaşayır və fəaliyyət göstərir. O, dekabrın 16-da Avropaya qayıdaraq konsertdə iştirak etməli idi. Amma o, uşaqların sağlamlığı uğrunda təşkil olunan konsertə görə səfərini ləğv edib. Erdal Baydar dekabrın 18-də öz qrupu ilə sözügedən xeyriyyə konsertində iştirak edəcək
Arzu Qocayev
Xeberle.com

Xəbərdən istifadə edərkən istinad etmək vacibdir.