59 yaşlı Elmira Ağayeva dalandardır. Altı ilə yaxındır ki, küçələri süpürür. Hər gün təmiz məhəllərədən keçib işə gedək deyə, o, sübh altıdan təmizliyə başlayır. Əzmkar və zəhmətkəş xanım Yardımlıdan Sumqayıta üz tutub. Natamam orta təhsili olan Elmira xanım iki növbədə işləyir. Səhərlər 6-dan 12:00-dək, ikinci növbədə isə saat 2-dən axşam 17-dək. O, tək yaşayır, ailəsi yoxdur. Həmsöhbətimiz insanların ətraf mühitə biganə yanaşmalarından şikayətlənir. Deyir ki, onları düşünən yoxdur. Elmira Ağayeva işlədiyi bu illər ərzində bircə dəfə də olsun yerdən pul tapmadığını deyir. Yarızarafat, yarıciddi, bu məqamı taleyi ilə əlaqələndirir. Havanın üzü yavaş-yavaş açılmağa başlayır. Elmira Ağayeva isə hələ də həyəti süpürməkdədir. İş növbəsinin bitməsinə saatlar qalıb. Hələ o, sizin son tüstüsünə qədər ciyərinizə çəkib yerə atdığınız siqaret kötüklərini, qutularını, çırtlayıb yerə tökdüyünüz günəbaxan tumlarını süpürməli, əzilən su qablarını toplamalıdır. Elmira xanımın timsalındakı zəhmətkeş dalandarların xətrinə, çalışın ətrafı zibilləməyin!
RAMİL ZEYNALLI
Xəbərdən istifadə edərkən istinad etmək vacibdir.