Avsrtiyanın paytaxtı Vyana şəhərində ATƏT Parlament Assambleyasının qış sessiyası keçirilir. Parlament Assambleyasının Demokratiya, insan hüquqları və humanitar məsələlər komitəsində "Artan populizm ərəfəsində insan hüquqlarının qorunması” mövzusunda xüsusi müzakirə keçirilib. Müzakirədə çıxış edən Milli Məclisin deputatı Tahir Mirkişili "İki sahil” qəzetinə açıqlamasında dünyada artan populizmdən və onun indiki və gələcək fəsadlarından danışıb.
"İnsan haqları universaldır. Bu sahədə hər hansı bir selektiv yanaşma və diskriminasiya olmamalıdır. Siz öz qonşunuzu xoşlamaya bilərsiniz, ancaq əgər siz onun hüquqlarını bu gün pozursunuzsa, siz də sabah öz hüquqlarınızı pozulmuş görəcəksiz” - deyən Tahir Mirkişili çıxışı zamanı diqqəti ABŞ və Avropada əsas təhlükə kimi qəbul edilən miqrantlara və onların hüquqlarına cəlb edib. O, bir sıra ölkələrdə populist çıxışların ksenofobiya, irqçilik və islamafobiyanın artmasına gətirib çıxardığını qeyd edərək, bəzi siyasi qüvvələrin bundan yararlanaraq siyasi güc əldə etmək planlarını açıqladı.
T.Mirkişili sonda bütün parlamentarilərin əsas vəzifələrinin qarşılıqlı hörmət, multikulturalizm, dialoq mədəniyyəti və harmoniya kimi dəyərlərin yayılması olduğunu xatırladaraq, bu gün hər kəsin üzləşdiyi çöxüzlü problemlərin həllinin yalnız dini, irqi və milli müxtəlifliyin qorunmasında olduğunu bəyan edib.
ATƏT Parlament Assambleyasının Siyasi məsələlər və təhlükəsizlik komitəsinin iclasında "ATƏT regionunda transmilli terrorçuluq” mövzusunda xüsusi debatda çıxış edən Milli Məclisin deputatı Azərbaycanın Ermənistan tərəfindən daim terrora məruz qalmasını, ərazilərinin işğal edilməsini və 1 milyondan çox insanın məcburi köçkünə çevrilməsini bir daha iştirakçıların diqqətinə çatdırdı: "Terrorçuluq Ermənistanın dövlət siyasətidir. 1992-ci ilin 26 fevralında Azərbaycan şəhəri olan Xocalının məhv edilməsi, yüzlərlə dinc sakin, qadın və uşaqların qətlə yetirilməsi Ermənistan rəhbərliyi, xüsusən də bunu özü etiraf edən Ermənistan prezidenti Sarkisyan tərəfində törədilmişdir.”
Komitənin iclasında T.Mirkişili hər kəsi Ermənistana təzyiq göstərməyə və işğalçı ölkəyə müvafiq sanksiyaların tətbiqinə çağırıb. Ermənistanın beynəlxalq terrorçuları öz silahlı qüvvələrinə cəlb etdiyini və terrorçulara Ermənistanda qəhrəman kimi heykəl qoyulduğunu diqqətə çatdıran deputat ATƏT regionunda təhlükəsizliyin bərpa edilməsi üçün belə işğalçı ölkələrin "müalicə” olunmasının vacibliyini vurğulayıb.
İki sahil
Xəbərdən istifadə edərkən istinad etmək vacibdir.