Xocalı soyqırımının 25-ci ildönümündə Türkiyənin İzmir şəhərində fəaliyyət göstərən dərnəklərimiz və bələdiyyələr ard-ardına bir neçə tədbir keçirib. Qarabağlar rayonu ərazisindəki parkın və abidənin açılışından sonra Bornova rayonunda da anma tədbirləri təşkil olunub. İzmir Azərbaycan Kültür və Dayanışma dərnəyinin təşəbbüsü ilə 2016-cı ildə Bornova Bələdiyyəsi tərəfindən açılışı olmuş Azərbaycan Dostluq parkında Xocalı şəhidlərinin xatirəsinə ucaldılmış abidənin önündə tədbir olub. Görüşdə Azərbaycandan gələn millət vəkilləri, komitə sədrləri, diplomatlar, habelə Bornova Bələdiyəsinin başqanı, İzmirdəki rəsmi şəxslər də iştirak edib. Şəhidlərin ruhuna dualar edildikdən sonra abidə önünə çələng qoyulub. Bundan sonra Bornova Bələdiyyəsi və İzmir Azərbaycan Kültür və Dayanışma dərnəyi birgə təşkil etdiyi "Xocalı Soyqırım"dır konfransı keçirilib. Çıxış edən Bornova Bələdiyyə başqanı Olgin Atilla Xocalının hər bir türkün acısı olduğunu, o günü unutmağa haqqımızın olmadığını xüsusi vurğulayıb. Bələdiyyə başqanı bu acının az da olsa, dinməsi üçün belə bir addım atdıqlarını, gələcək nəsillərin də bu faciədən xəbər tutması üçün hərkəsin birlikdə bu yolda çalışmasının lazım olduğunu dedi. Dərnək başqanı Mülazim Paşa da öz növbəsində gələn bütün qonaqları salamlayaraq Bələdiyyə sədrinə xüsusi təşəkkür edib. O, Olgun bəyin Xocalı soyqırımına həssas yanaşdığını, konfransın keçirilməsi üçün tabeliyində çalışan hər kəsin var qüvvəsini səfərbər etdiyini xüsusilə qeyd etdi. Qarabağ dərdinin bütün Türk dünyasının dərdi olduğunu qeyd edən Mülazim bəy bunun üçün birliyə nail olmanın vacibliyindən danışdı. O, üzünü konfrans iştirakçılarına tutaraq "Xalqımızın dərdini dünyaya çatdırmaq istəyiriksə, bir-birimizin ayağının altına daş qoymaqdansa bunun üçün əlimizi daşın altına qoymalıyıq", - dedi. Konfransda çıxış edən Azərbaycanın millət vəkili Qənirə Paşayeva da o günün acılarından danışaraq bu cür keçirilən tədbirlərin dosta və düşmənə mesaj olduğunu söylədi. Millət vəkili Aydın Hüseynovda öz növbəsində İzmirlilərə təşəkkür edərək birliyimizin gücümüz olduğunu, Xocalı dərdinin hər bir türkün dərdi olduğunu vurğuladı. Xatırladaq ki, İzmir Azərbaycan Kültür və Dayanışma dərnəyinin təşəbbüsü ilə Azərbaycan əsilli Türkiyə vətəndaşı Gülnarə Muxtarova Pamukun "Xocalı Soyqırımı" ilə bağlı böyük bir rəsm sərgisi nümayiş etdirildi. Sərgidə o faciəvi günləri özündə əks etdirən 30 tablo yer alırdı.