Dövlət Statistika Komitəsinin 2017-ci il yanvar ayının 1-nə olan məlumatına görə, Azərbaycanda işsizlik səviyyəsi 5 faiz həddindədir. Məşğulluq xidməti orqanları tərəfindən ölkə üzrə rəsmi işsiz statusu verilmiş şəxslərin sayı 329 72 nəfərdir. Onların 38,1 faizini qadınlar təşkil edir. İşsizliyə görə müavinətin orta məbləği isə 249,1 manatdır. Yəni, Azərbaycanda işsizlik səviyyəsi əksər ölkələrlə, eləcə də ayrı-ayrı inkişaf etmiş ölkələrlə müqayisədə aşağıdır. İşsizlik səviyyəsi İspaniyada 19,6, Fransada 9,9, Finlandiyada 8,8, Xorvatiyada 12,8, Belçikada 8, Bolqarıstanda 7,7, Danimarkada 6,2, Latviyada 9,7, Litvada 8, Portuqaliyada 11,2, Slovakiyada 9,7, İsveçdə 6,9, Rumıniyada 6, Niderlandda 6 faiz təşkil edir.
İqtisadi İslahatların Təhlili və Kommunikasiya Mərkəzindən AZƏRTAC-a bildiriblər ki, dünya iqtisadiyyatında baş verən neqativ proseslərin Azərbaycan iqtisadiyyatına təsiri nəticəsində 2015-ci ildə ixracın həcmi və dövlət büdcəsinin gəlirlərinin azalması işsizlik səviyyəsinin əvvəlki ilə nisbətən 2 faiz artmasına səbəb olub. Amma işsizliklə bağlı açıqlanan son rəqəmlər bu sahədə müsbət tendensiyadan xəbər verir. Xüsusən də 2016-cı ildə kənd təsərrüfatında əməktutumlu sahələrin inkişafının dəstəklənməsi, turizmin inkişafı tikinti sektorunda işini itirən vətəndaşlar üçün məşğulluq imkanı yaradıb və işsizliyin səviyyəsinin artmasının qarşısını alıb. Bu, çox müsbət haldır və növbəti illərdə ölkədə işsizliyin azaldılması istiqamətində konkret tədbirlər həyata keçiriləcək: "Prezidentin 2016-cı il 16 mart tarixli Sərəncamına əsasən, strateji yol xəritələrinin hazırlanması, iqtisadi islahatlarla bağlı mühüm addımların atılması işsizliklə bağlı problemlərin həllinə töhfə verəcək. Belə ki, strateji yol xəritələrinin icrası nəticəsində 2025-ci ilədək ümumi daxili məhsulda 3 faizdən çox orta illik real artım və əlavə olaraq 450 mindən çox yeni iş yerinin yaradılması nəzərdə tutulur. Belə ki, qarşıdakı illərdə iqtisadiyyatın strukturu qeyri-ticari bölməyə nisbətən ticari bölmənin, hasilata nisbətən emalın, dövlət sahibkarlığına nisbətən özəl sahibkarlığın, aşağı texnologiya tutumlu sektorlara nisbətən yüksək texnologiyalara əsaslan sektorların və aşağı dəyər yaradan sektorlara nisbətən yüksək dəyər yaradan sektorların daha üstün artımı hesabına yenidən balanslaşacaq. Bu isə o deməkdir ki, qarşıdakı illər ərzində işsizliklə bağlı ciddi problemlər olmayacaq".
Qeyd edilib ki, qarşıdakı illərdə strateji yol xəritələrindəki tədbirlərin reallaşdırılması üçün 27 milyard manat civarında investisiyanın ayrılması nəzərdə tutulub. Növbəti illərdə turizm sektorunun, emal sektorunun inkişafı və digər aşağıixtisaslı əməyə nisbətən yüksəkixtisaslı əməyə əsaslanan sahələrin inkişafı gənc vətəndaşlar üçün yeni iş yeri imkanı yaradacaq. Artıq ölkədə məşğulluğun strukturu dəyişiklikdə nəzərə çarpır və xidmət sektorunun payı 50 faizi keçib.
"Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"nin icrası isə xidmət sektorunun inkişafına təkan olacaq. Yeni yaranan sektorların kadr təminatı üçün "Azərbaycan Respublikasında peşə təhsili və təliminin inkişafına dair Strateji Yol Xəritəsi"nin icrası da xüsusi rol oynayacaq. Bu yol xəritəsində inkişaf etdirilməsi planlaşdırılan sektorların kadrla təminatının yüksək səviyyədə həyata keçirilməsi nəzərə alınıb. Bu isə onu göstərir ki, strateji yol xəritələrinin həyata keçirilməsi ilə ölkədə məşğulluğun artırılmasına nail olunacaq.
Xəbərdən istifadə edərkən istinad etmək vacibdir.
