Azərbaycan Demokratik Tələbə Gənclər Təşkilatı (ADTGT) Azərbaycan Respublikasının Gənclər və İdman Nazirliyinin maliyyə dəstəyi ilə "Erkən nikahlarlara YOX: ictimai qınaq və maarifləndirməyə ailədən və təhsildən başlayaq” layihəsinin icrasına başlayır. ADTGT-nin İctimai əlaqələr və informasiya departamentindən Xeberle.com-a verilən məlumata görə, geniş maarifləndirmə, məlumatlandırma, sosial reklam və PR xarakterli aksiyalarla həyata keçiriləcək layihə Şirvan, Şəki şəhərlərini, Masallı və Ağsu rayonlarını əhatə edəcəkdir.
Cari ilin martın 15-dən start götürən və 4 ay davam edəcək fəaliyyətlərə ilk olaraq regionlarda erkən nikahların obyektiv mənzərəsinə aid ictimai monitorinq və sosioloji sorğuların aparılması, bölgələrdə aidiyyətli yerli hakimiyyət strukturları təmsilçilərinin, təhsil, səhiyyə, mədəniyyət, gənclər, ədliyyə, hüquq-mühafizə orqanları və fəal ictimaiyyət nümayəndələrinin, ailə, ağsaqqal və din institutu üzvlərinin, KİV, digər qurum və şəxslərin iştirakı ilə məlumatlandırıcı, təbliğati, qınaq xarakterli ictimai müzakirələrin keçirilməsi, gənclərin iştirakı mövzuya dair seminar və təlimlərin təşkili, sosial şəbəkələrdə, KİV və sosial mediada xüsusi PR kampaniyalarının aparılması və virtual ictimai debatların təşkili daxildir. Layihə çərçivəsində "Erkən nikahlar: ictimai qınaq və maarifləndirmə” adlı kitabçanın və informasiya xarakterli bukletin nəşri və yayıımı da həyata keçiriləcəkdir.
Layihənin məqsədi regionlarda yeniyetmə və gənc qızlar və oğlanlar arasında erkən nikahların yayılmasına "YOX” demək, onların özlərini və valideynlərini bu cür zərərli addımlardan çəkindirmək, bölgələrdə müxtəlif strukturların iştirakı ilə ictimai qınaq, ictimai maarifləndirmə kampaniyasına və digər sosial aksiyalara başlamaqdır. Layihənin digər məqsədlərindən biri də bölgələrdə yeniyetmə qız və oğlanlar arasında təhsilə və peşə vərdişlərinə maraq və motivasiya yaratmaqdır.
Xeberle.com
Xəbərdən istifadə edərkən istinad etmək vacibdir.
