Azərbaycan Respublikasının Birinci vitse-prezidenti Mehriban xanım Əliyevanın sədrliyi ilə Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olunmuş müşavirədə verilən tapşırıqlara uyğun olaraq Nəsimi rayonunda da müvafiq tədbirlər görülür.
Xeberle.com bildirir ki, Rayon İcra Hakimiyyətindən AZƏRTAC-a daxil olan məlumata görə, hazırda rayonda 2373 ailədən ibarət 8713 məcburi köçkün məskunlaşıb və onların mənzil-məişət şəraitinin yaxşılaşdırılması və işlə təmin olunmaları üçün zəruri tədbirlər həyata keçirilir. Nəsimi Rayon İcra Hakimiyyətinin təşəbbüsü ilə rayonun ən böyük istehsalat müəssisələrindən olan "Bakı Tikiş Evi” Səhmdar Cəmiyyətində məcburi köçkünlərin təmin olunması üçün yeni iş yerləri açılıb.
Rayon İcra hakimiyyəti başçısının birinci müavini Gülarə Verdiyeva yeni işə götürülmüş məcburi köçkünlərlə görüşüb. Məcburi köçkünlər onlara göstərilən diqqət və qayğıya görə Azərbaycan Respublikasının Prezidenti İlham Əliyevə və Azərbaycan Respublikasının Birinci vitse-prezidenti Mehriban Əliyevaya öz minnətdarlıqlarını bildiriblər.
"Bakı Tikiş Evi”nin baş direktoru Fidail Rəhimov çıxış edərək yeni iş yerləri açılması üçün gələcəkdə də tədbirlər görüləcəyini söyləyib.
Xəbərdən istifadə edərkən istinad etmək vacibdir.