Bu gün Xocalı Soyqrımını Tanıtma İctimai Birliyinin sədri Xalidə Cəbrayılova Vural, sədr müavini Xanım Əliyeva, birliyin üzvləri - Kəmalə Şirvani, Anar Aslanov, Fəxrəddin Behbudov, Sumqayıt şəhər 7 nömrəli orta məktəbin 5 A və 8 C sinif şagirdləri, Sumqayıt Vətən Müharibəsi Veteranlar Birliyinin nümayəndələri, qazilər və Qarabağ əlilləri aprel şəhidimiz Seymur Baxışovun ailəsinə baş çəkib, habelə onun Şəhidlər Xiyabanındakı məzarını ziyarət ediblər.

Birliyin sədri Xalidə Cəbrayılova Vural çıxış edərək bildirib ki, aprel şəhidləri xalqımızın yaddaşında silinməz izlər qoymaqla bərabər, Azərbaycan gəncləri üçün əsl vətənpərvərlik nümunəsinə çevriliblər. Sədr müavini Xanım Əliyeva isə öz çıxışında aprel şəhidlərinin xalqımızın qürur mənbəyi olduğunu, onların yazmış olduqları vətənpərvərlik səlnaməsindən söhbət açıb. O, şəhidin yaxınlarına başsağlığı verib, belə igid, qəhrəman, vətənpərvər övlad böyütdüyü üçün onun qarşısında baş əydiyini və ona sonsuz minnətdarlığını bildirib. Sumqayıt Vətən Müharibəsi Veteranlar Birliyinin nümayəndələri şəhidin xatirəsini yad edərək Seymur Baxışovun göstərdiyi şücaəti qürur hissi ilə vurğulayıblar. 7 saylı məktəbin şagirdləri isə Xanım Əliyevanın şəhidlərə həsr etdiyi şeirləri səsləndiriblər. Şəhidin anası Zemfira Baxışova bu şeirlərdən təsirlənib və övladının həqiqətən də necə mərd, qəhrəman insan olmasından danışıb: "Balam aprelin ən son torpağa tapşırılan şəhidi olub. İlk vaxtlar onun öldüyünə inanmırdım. Həqiqətən də o çox yaxşı, saf, təmiz insan idi. Allah bütün şəhidlərimizə rəhmət eləsin”.

Şəhidin bacısı Səbinə Baxışova və həyat yoldaşı Aynur Baxışova Seymur Baxışovla fəxr etdiklərini və gələn ziyarətçilərə öz təşəkkürlərini bildiriblər.

Sonda Seymur Baxışovun yaxınları və tədbir iştirakçıları şəhidin yaşadığı binanın qarşısındakı xatirə lövhəsi və Şəhidlər Xiyabanındakı məzarını ziyarət ediblər, ruhuna dualar oxuyublar və məzarı üzərinə tər qərənfillər qoyublar.

Xatırladaq ki, 10 ildir fəaliyyət göstərən "Xocalı Soyqrımını Tanıtma” İctimai Birliyinin Sumqayıt şöbəsi isə 3 ildir yaranıb. Qeyd edək ki, birlik növbəti günlərdə Sumqayıtdan olan bütün aprel şəhidlərimizin ailələrini ziyarət etməyi planlaşdırıb.

Elnarə Salamova
Xeberle.com

Xəbərdən istifadə edərkən istinad etmək vacibdir.