Əmlak Məsələləri Dövlət Komitəsi (ƏMDK) tərəfindən daha bir çoxmərtəbəli bina sakinləri "Kütləvi çıxarış” kampaniyasından yararlanıblar.
Xeberle.com-un verdiyi məlumata görə, Komitədən AZƏRTAC-a bildiriblər ki, kampaniya komitənin qeydiyyat xidmətlərini əhalinin bir başa ünvanlarında, iş yerlərində, kəndli və fermerin əkin sahələrində çatdıraraq onları vaxt itkisi olmadan, operativ şəkildə çıxarış əldə etməsinə imkan yaradır. Bundan başqa kampaniyanın üstünlüklərindən biri də ucqar kənd yerlərində, ahıl və fiziki məhdudiyyətli şəxslərin bilavasitə ünvanlarında keçirilməsidir.
Budəfəki, "Kütləvi çıxarış” kampaniyasından Sumqayıtda yerləşən "Kristal Abşeron”a məxsus 5 çoxmərtəbəli binadan ibarət yaşayış kompleksinin sakinləri yararlanıb. Mayın 5-də baş tutan bu kampaniya hər biri 1 bloklu 12 mərtəbəli yaşayış binalarının həyətində, sakinlərin bir başa ünvanında keçirilib. Ümumilikdə 91 mənzilli yaşayış kompleksinin həyətində komitənin mobil ofisləri vasitəsilə 60-a yaxın mənzil sahibinə hazır çıxarışlar təqdim edilib. Qalanlarından isə çıxarışla əvəz olunması üçün ilkin mülkiyyət sənədləri qəbul edilib, onlara hüquqi yardım göstərilib. Sakinlərə çıxarış almaq üçün lazım olan sənədlər barədə məlumat verilib. Həmin sənədlərin hansı qurumdan alınması ilə bağlı məlumatı az olan vətəndaşların suallarını komitənin əməkdaşları cavablandırıb. Çıxarışların vətəndaşlara ünvanlarında təqdim olunması onlar üçün daha optimal şərait yaradır. Belə ki, bu həm məişət həm də işgüzar fəaliyyətini yerinə yetirməsi üçün bina sakinlərinə əlavə zaman qazandırır. Vaxtlarına qənaət edən sakinlər sənədləşdirmənin sürətli və rahat şəkildə aparılması, xidmətlərin birbaşa ünvana çatdırılmasından razılıqlarını ifadə ediblər. Qeyd edilməlidir ki, çoxmərtəbəli binalarda cari ildə 3 "Kütləvi çıxarış” kampaniyası keçirilib. Kampaniya Bakının bir neçə rayonunda və Abşeronda baş tutub. Ümumilikdə 200-ə yaxın vətəndaşa çıxarışlar təqdim olunub, 300-dən çox şəxsdən çıxarışla əvəz olunması üçün ilkin mülkiyyət sənədləri qəbul edilib.
Komitənin mobil ofis xidmətləri də gündəlik olaraq respublikanın müxtəlif ərazilərinə gedərək fərqli növlərdə qeydiyyat xidmətləri göstərir. Bu xidmətlərin həyata keçirilməsində başlıca məqsəd daşınmaz əmlakın qeydiyyatı ilə bağlı qanunvericilik və prosedurlar barədə vətəndaşları maarifləndirmək və göstərilən xidmətləri daha da sadələşdirməkdir.
Komitə tərəfindən bu ilin sonunadək paytaxt və regionlarda mobil ofis xidmətləri, həmçinin "Kütləvi çıxarış” kampaniyası davam etdiriləcək.
Xəbərdən istifadə edərkən istinad etmək vacibdir.
