Dünən mətbuatda gedən "Bakıda bıabırçılıq! Kişilər tərəfindən zorlanan 5 yaşlı uşaqda görün nə aşkarlandı!” başlıqlı xəbər Azərbaycan Uşaqlar Birliyinin (AUB) sədri Kəmalə Ağazadəni qəzəbləndirib.
Hazırda ölkədə olmayan Kəmalə xanım Oxu.Az-a açıqlamasında xəbəri yayan saytı məhkəməyə verəcəyini bildirdi: "Hörmətli "media” nümayəndəsi hazırlaşsın, yalan məlumat yaydığına görə onunla məhkəmədə görüşəcəyik. Hazırda məhkəməyə təqdim ediləcək sənədləri hazırlayırıq. Kriminal.az saytı, deyəsən, kriminal axtarır!”.
Birliyin sədri 5 yaşlı Yağmurun cinsi zorakılığa məruz qalmasının və QİÇS-ə yoluxmasının həqiqətəuyğun olmadığını söylədi: "Yağmur 1 aya yaxındır Azərbaycan Uşaqlar Birliyinin uşaq sığınacağındadır. Biz onu tibbi müayinələrdən, ekspertizadan keçirmişik, söhbətlər aparmışıq.
Bəli, uşaq fiziki zorakılığa məruz qalıb, amma cinsi zorakılığa məruz qalması aşkarlanmayıb. Anasını da tapmışıq, lakin uşağı ona geri qaytarmaq fikrimiz yoxdur. Uşağa qarşı cinsi zorakılıq olmayıb, QİÇS daşıyıcısı olması da yalandır. Qanunla, həqiqətən, QİÇS daşıyıcı olan birinin belə anonimliyi qorunmalıdır. Burada isə söhbət, tamamilə, əsassız bir məlumatın tirajlanmasından gedir. Yağmur barəsində yalan məlumatı yayan jurnalist cinayət məsuliyyəti daşıyır”.

Xəbərdən istifadə edərkən istinad etmək vacibdir.