Anar Almadatov adlı soydaşımızın Tiflisdən Moskvaya uçarkən yanında oturan erməni millətindən olan şəxsin ölməsindən və həmvətənimizin ona yardım göstərməsindən bəhs olunurdu.
Xəbər tam olaraq beləydi: "Bir neçə saat öncə Tiflisdən Moskvaya uçan təyyarə Rostova təcili eniş etməli olub. Musavat.com sosial şəbəkələrə istinadən xəbər verir ki, buna səbəb sərnişinlərdən birinin uçuş zamanı dünyasını dəyişməsi olub. Bu barədə Anar Almadatov adlı Facebook istifadəçisi özünün profilində yazıb. O, bildirib ki, ölən erməni onunla yanaşı oturubmuş.
Hadisənin davamı A. Almadatovun dilindən: "Tiflis Moskva səfəri... Rostova təcili eniş... Səbəb bir erməni sərnişinin təyyarədə qəfil ölümü... Yanımda oturmuşdu... Erməni sərnişinin ölməməsi üçün əlimdən gələni etdim... 10 yaşında oğlunun və xanımının gözləri önündə öldü... Həyata və işə aid bütün iştahım söndü... İlk dəfə qollarım üstə bir insan öldü... Qədərimdə erməni üçün göz yaşı tökmək varmış... Uşağının çığırtısı getmir qulağımdan..."
Erməninin kimliyi və başqa təfsilatlar barədə xəbər verilmir".
Bu gün sosial şəbəkədə Anar Almadatovu qınayan statuslar, şərhlər paylaşılmaqdadır.
Əslində, bu münasibəti anlamaq mümkündür. Ermənistan və Azərbaycan arasında 29 ildən bəri davam edən müharibə var və bu müharibə lap çoxdan vətən, torpaq savaşından çıxaraq, milli müharibəyə, ölüm-qalım savaşına çevrilib. Bu müharibədə minlərlə soydaşımız həlak olub, yaralanıb, yüz minlərlə ev-eşiyimiz, yurd-yuvamız yandırılıb, dağıdılıb. 700 mindən artıq həmvətənimiz didərgin salınıb və s. və i.a.
Ancaq təyyarədə yanında oturan adamın ölməsi xüsusi bir durumdur. Çox nadir adamlar ola bilər ki, bu halda etinasız yanaşsın, soyuqqanlılığını qoruyub saxlaya bilsin.
Əgər A.Almadatov həmin erməniylə Qarabağdakı səngərlərdən birində üzləşsəydi, kipriyini də qırpmadan onu güllələyərdi. Amma təyyarə göyərtəsində ailəsi-uşağı ilə birlikdə başqa bir şəhərə uçmaq istəyən dinc şəxsə səngərdəki kimi nifrətlə yanaşmaq mümkün deyil.
Yəni adamın erməni olması onu avtomatik olaraq hərbi cani etmir. Ermənistanın özündə də müharibəyə qarşı olan yüz minlərlə erməni tapmaq olar.
Sadəcə, bu iki qonşu xalq arasında düşmənçilik o səviyyədədir ki, hər iki tərəfdə əhalinin böyük hissəsi militarist ruhdadır və önündəkinin insan olmasına məhəl qoymayacaq qədər aqressivdir.
Biz əvvəl-axır düşmənə qalib gələcəyiksə, xoş məramımıza, daha tolerant, təmkinli olduğumuza görə qalib gələcəyik. Biz bu kimi addımlarla, hərəkətlərlə dünyaya sübut etməliyik ki, bəşəri dəyərlərə hörmətimiz düşmənimizinkindən daha artıqdır.
Ona görə də ölüm ayağında olan bir mülki erməninin həyatını xilas etməyə çalışan həmvətənimizi qınamaq lazım deyil, əksinə, alıqşlamaq lazımdır. Bu xəbəri tərcümə edərək dünyaya çıxarmaq lazımdır, nəinki Almadatovu öz statusunu pozmağa vadar etmək...
Unutmayaq, biz Çanaqqala savaşlarında öz düşməninin yarasını sarıyan, ölüsünü hörtmətlə dəfn edən bir etnosun təmsilçiləriyik.
Musavat.com
Xəbərdən istifadə edərkən istinad etmək vacibdir.
