Sumqayıt şəhərindəki dükan-mağazaların vitrinlərində tez-tez şəkərli diabet xəstələri üçün nəzərdə tutulan dietik məhsullarla qarşılaşırıq. Bu xəstəlikdən əziyyət çəkən insanlar isə arxayınlıqla həmin qidalardan istifadə edirlər. Bəs adıçəkilən məhsullar həqiqətənmi dietikdir?

Azad İstehlakçılar Birliyinin (AİB) sədri Eyyub Hüseynov Xeberle.com-a açıqlamasında bildirdi ki, rəhbərlik etdiyi təşkilat bununla bağlı araşdırma aparıb.

"Bizim əlimizdə Səhiyyə Nazirliyindən rəsmi göndərilmiş məktub var. Məktubda qeyd olunur ki, vitrinlərdə satılan "Novıy Saxar", "Sladkiy Saxar" və "Sorbit" deyilən məhsulların şəkər xəstəliyinə xeyiri yoxdur ki, zərəri var. İqtisadiyyat Nazirliyinə dəfələrlə bu məhsulların vitrinlərdən yığışdırılması ilə bağlı təklif vermişik".

E.Hüseynov qeyd etdi ki, vitrinlərə qoyulan məhsulların təxminən 30 %-i şəkərli diabet xəstələrinə faydasızdır.

"Üstəlik, televiziyalarda geniş reklam olunan "Sinir otu"nun da şəkər xəstəliyini sağaltmaq effekti yoxdur. İstehlakçılar bu reklamla aldadılır. Ümumiyyətlə, dietik məhsulları alarkən şəkər xəstələri çox diqqətli olmalıdırlar. Məhsulların üzərində yazılan etiketlərə inanmaq lazım deyil, onların böyük hissəsinin diabet xəstəliyinə xeyiri yoxdur".

Azərbaycan Diabet Liqasının (ADL) sədri Yeganə Sultanova KİV-ə verdiyi açıqlamasında bildirib ki, vitrinlərdə şəkər xəstələri üçün ziyanlı olan məhsullar satılır: "Hər bir məhsulun üzərində tərkib hissəsi yazılır. Sadəcə insanlar ona əhəmiyyət vermirlər. İnsulindən və dərman pereparatlarından istifadə edən diabet xəstələri məhsulun üzərində yazılan karbohidratın miqdarına diqqət etməlidir. Təəssüflər olsun ki, marketlərin şəkər xəstələri üçün nəzərdə tutulan vitrinlərində lazımsız məhsullar da satılır. Misalçün "Sladkiy Saxar”. Bir vaxt biz onun həmin vitrinlərdən yığışdırılması ilə bağlı mübarizə aparmışıq. Yenə də bu məhsul satılır. Onun üzərində qeyd olunur ki, məhsulun 100 qramının 99.6 qramı təbii şəkərdir. Cəmi 0.4 qram şəkər əvəzedici varsa, deməli, bu şəkərli diabet xəstəsi üçün zərərlidir. Ucuz olduğu üçün insanlar bu məhsula üstünlük verir. Şəkərli diabet xəstələrinə məsləhət görərdim ki, belə məhsullardan istifadə edib sağlamlıqlarını təhlükəyə atmasınlar”.