"Professor Lütfi Zadə (Lütfi Rəhim oğlu Ələsgərzadə) haqqında ilk dəfə 9-cu sinifdə (1991) İnformatika dərsliyində oxumuşdum. O zaman dünyaca məşhur bir alimin azərbaycanlı olması hamımızda böyük maraq oyatmışdı. Uşaqların əksəriyyətində və xüsusən də məndə İKT-yə maraq da elə o dövrdən və məhz Lütfi Zadənin sayəsində yaranmışdı... Azərbaycanın yenicə müstəqillik əldə etdiyi bir dövrdə informatika müəllimimiz Lütfi Zadənin şəxsində azərbaycanlıların potensial olaraq nəyə qadir olduqlarını bizə anlatırdı”.
Bu sözləri
Xeberle.com-a Milli Məclisin deputatı Tahir Mirkişili deyib.
Deputat bildirib ki, 2006-cı ildə Lütfi Zadə ilə ABŞ-da görüşüb.
"O, Azərbaycanı daim izlədiyini, inkişaf konsepsiyasını və seçdiyi yolu xeyli müzakirə edir, doğru yolda olduğumuzu deyir və digər ölkələrlə müqayisə edirdi. Hiss olunurdu ki, o ürəkdən Azərbaycanı düşünür, bir alim kimi öz hisslərini bizimlə bölüşürdü. Daha sonra o, yaşının çoxluğuna və məsafənin uzaqlığına baxmayaraq, Azərbaycana gəldi və dövlət başçısı tərəfindən "Dostluq” ordeni ilə təltif olundu. Lütfi Zadə bu ordeni daim sinəsində daşıdı”.
T.Mirkişili deyib ki, Lütfi Zadənin Azərbaycan və dünya elminə, mədəniyyətinə töhfəsi çox olub.
"Əminəm ki, indidən sonra da olacaq. Bəlkə də "Dünya vətəndaşları” siyahısı müəyyən etsəydilər, bu siyahıda xeyli azərbaycanlılar olardı. Lütfi Zadə dünyasını dəyişdi. Bir dünyadan digər dünyaya köçdü. Bu dünyada onun kəşfləri, azərbaycanlı kimliyi və "Dostluq” ordeni qaldı. "Professor Zadə” əfsanəsi isə davam edir, onun yolunu davam etdirən və ondan ruhlanan neçə azərbaycanlı olacaq. Bunu tarix göstərəcək”.
Xəbərdən istifadə edərkən istinad etmək vacibdir.