Akif Əliyev 40 ilə yaxındır Biləcəri dəmiryol stansiyasında yük qatarının maşinisti vəzifəsində çalışır. Ömrünün böyük hissəsini dəmir relslər üzərində keçirib. Deyir dəmiryolçu olmaq müqəddəs peşədir. Akif Əliyev dəmiryolunun üzərində keçən ömrünə heyfislənmir. Sevdiyi işlə məşğul olduğundan yaşının bu çağında da yorulmaq bilmədən işləyir. Akif dayı deyir ki, maşinist diqqətli olmalıdır ki, bədbəxt hadisələrlə üzləşməsin. O, həm qatarı idarə etməli həm də ki, dəmiryol xəttinin üzərində maneələrin olub-olmamasına baxmalıdır. Onun arzusu maşinist kimi dünyanın aparıcı şəhərlərini qatarla qət etməkdir. Maşinistlər kimi qatar tərtibatçılarının da üzərinə böyük yük düşür. 15 ildir ki, Nicat Abdullayev vaqonları yoxlayır. Biləcəri dəmiryol stansiyasının tarixi 19-cu əsrin sonlarına təsadüf edir və Azərbaycanda avtomatlaşdırılan təpəli iri çeşidləmə stansiyasıdır. Ölkənin bütün istiqamətlərinə gedən yük qatarları məhz bu stansiyadan keçərək yollarına davam edirlər. Respublika üzrə dəmir yollarının ümumi uzunluğu 4312,8 km təşkil edir. Azərbaycanda beynəlxalq istiqamətdə 4, ölkədaxili 6 sərnişin və 3 elektrik qatarı fəaliyyət göstərir. Onuda deyək ki, torpaqlarımızın 20%-nin Ermənistan silahlı qüvvələri tərəfindən işğal edilməsi nəticəsində 240,4 km uzunluğunda dəmir yolu xətti işğal altında qalıb. Ölkə başçısının 7 oktyabr 2005-ci il tarixli sərəncamı ilə 13 oktyabr - Dəmiryolu işçilərinin peşə bayramı günü kimi təsis olunub. Və artıq 9 ildir ki, Akif dayı və Nicat Abdullayev də daxil olmaqla bütün dəmiryolçular bu günü peşə bayramı kimi qeyd edir.
RAMİL ZEYNALLI
Xəbərdən istifadə edərkən istinad etmək vacibdir.