Sumqayıt şəhəri inkişaf edir və gözəlləşir. Hər gün yeni obyektlərin açılması, küçələrin asfaltlanması şəhər üçün müsbət haldır. Ancaq əksər vaxtlarda yeni tikilən obyektlər, asfaltlanan yollar kanalizasiya quyularının üzərində tikilir və salınır. Bəs bu cür hallar hansı fəsadlara gətirib çıxarır? Problemin həlli üçün hansı addımlar atılmalıdır?

Xeberle.com olaraq məsələ ilə bağlı Sumqayıt Sukanal İdarəsinin rəis müavini Qurban Mikayılovla əlaqə saxladıq. O bildirdi ki, bu halla bağlı olaraq həm "Azərsu"ya, həm də Sumqayıt şəhər İcra Hakimiyyətinə şikayət edilib. "Kanalizasiya quyularının üzərində açılan obyektlər N qədərdir. Sülh küçəsində yerləşən "Ən ucuz market"in yanından Heydər Əliyev prospektinə qədər olan ərazidə, Rustavi küçəsində, Səməd Vurğun küçəsində kanalizasiya quyularının üzərində obyektlər tikilib. Bu halların qarşısını almaq üçün bir hissəsini cənab başçının göstərişi ilə yazıb vermişik məhkəməyə və birinci instansiyanı udmuşuq. Bu obyektlər ya sökülməlidir, ya da obyektlərin öz hesabına yeni xətlər çəkilib qoşulmalıdır. Küçələrin asfaltlanması zamanı da kanalizasiya quyularının üzəri asfaltlanır ki, bu hallarda həmin yerin üzərini açaraq asfaltla eyniləşdirirlər. Hal-hazırda 8-ci mikrorayonda bu hal baş verib və özümüz həmin yerlərin üzərini açaraq kanalizasiya quyuları ilə asfaltın ölçüsünü tənzimləyirik.”

Q.Mikayılov bundan başqa qeyd etdi ki, şəbəkə xətlərinin üzərində obyektlərin açılması şəhər üçün böyük problemlərdən biridir və bu problemin həlli üçün hal-hazırda çalışırlar.