Yeni Azərbaycan Partiyasının (YAP) yaranmasının 25 illik yubileyi ilə əlaqədar noyabrın əvvəllərində start verilmiş "Hərəyə bir ağac əkək” kampaniyası çərçivəsində Sumqayıtda növbəti ağacəkmə aksiyası keçirildi.
Aksiyada YAP Sumqayıt şəhər təşkilatının İdarə Heyəti və Şura üzvləri, Qadınlar Şurasının və Gənclər Birliyinin nümayəndələri iştirak etdilər.
Aksiya üçün şəhərin 5-ci mikrorayonunda ayrılmış sahədə xeyli sayda həmişəyaşıl və dekorativ ağaclar əkildi və suvarıldı.
Sumqayıt son illərdə çox gözəlləşib, müasirləşib. Gündən-günə şəhərdə ekoloji şəraitin yaxşılaşdırılması istiqamətində mühüm yaşıllaşdırma işləri görülür. Həyata keçirilən yaşıllaşdırma tədbirlərinin tərkib hissəsi kimi YAP Sumqayıt şəhər təşkilatı da Respublikanın hər yerində olduğu kimi Yeni Azərbaycan Partiyası İcra Katibliyi tərəfindən başladılmış ağacəkmə kampaniyasına qoşulmuşdur – deyən YAP Sumqayıt şəhər təşkilatının sədri Ramiz Hüseynov "Hərəyə bir ağac əkək” kampaniyasının mütəmadi olaraq 2018-ci ilin aprel ayına qədər davam edəcəyini, şəhərin müxtəlif yerlərində ağac və bəzək bitkiləri əkiləcəyini bildirdi.
Sədr bu kampaniyanın Sumqayıtda yaşıllığın genişləndirilməsinə, ekoloji durumun daha da yaxşılaşdırılmasına öz töhfəsini verəcəyini bildirdi.
Xəbərdən istifadə edərkən istinad etmək vacibdir.
