FHN Sumqayıt Regional Mərkəzində xidmət və təsərrüfat obyektlərinin ştatlı mülki müdafiə rəisləri və mülki müdafiə mühəndisləri ilə toplantı keçirilib.Xeberle.com-a verilən məlumata görə, toplantıda FHN Sumqayıt Regional Mərkəzin rəhbər heyəti, Sumqayıt şəhəri, Abşeron və Xızı rayonlarının ştatlı mülki müdafiə rəisləri və mülki müdafiə mühəndisləri iştirak edib. Toplantının keçirilməsində məqsəd qarşıda duran vəzifələrin həlli və mövcud problemlərin aradan qaldırılması sahəsində birgə fəaliyyətin göstərilməsindən ibarət olub. Toplantını giriş sözü ilə açan FHN Sumqayıt Regional Mərkəzin Fövqəladə halların xəbərdar edilməsi və mülki müdafiə idarəsinin rəisi, kapitan Nurlan Həsənov toplantının keçirilməsinin məqsədi barəsində geniş məlumat verib. O, Fövqəladə Hallar Nazirinin 04.10.2017-ci il tarixli 20/01-006 saylı qərarı ilə təsdiq olunan FHN Sumqayıt Regional Mərkəzinin əsasnaməsinə uyğun olaraq Sumqayıt Regional fövqəladə hallar və mülki müdafiə şöbəsinin Mərkəzə birləşdirilməsi və əhatə etdiyi ərazidə yerləşən xidmət və təsərrüfat obyektlərinin ştatlı mülki müdafiə rəislərinin və mülki müdafiə mühəndislərinin fəaliyyətinə nəzarətin Mərkəzə həvalə olunması haqqında məlumatı diqqətə çatdırıb. İdarə rəisi 2018-ci ildə toplantı iştirakçılarına fəaliyyətlərində uğurlar arzulayıb. Sonra çıxış edən Sumqayıt Regional fövqəladə hallar və mülki müdafiə şöbəsinin rəisi, mayor Emin Əliyev 2018-ci il ərzində qarşıda duran vəzifələr barədə toplantı iştirakçılarına ətraflı məlumat verib. O, ştatlı mülki müdafiə rəisləri və mülki müdafiə mühəndislərinə 2018-ci ilin mülki müdafiə planının işləmə qaydalarını izah edərək müəyyən olunmuş zamanadək Regional Mərkəzə təqdim etmələrini diqqətə çatdırıb.

Sumqayıt Regional fövqəladə hallar və mülki müdafiə şöbəsi rəisinin baş köməkçisi baş leytenant Ruslan İbrahimov xidmət və təsərrüfat obyektlərində nəzərdə tutulan mülki müdafiə tədbirlərinin vaxtları və yoxlama tarixləri barəsində məlumatları toplantı iştirakçılarının nəzərinə çatdırıb. Toplantıda qarşılıqlı fikir mübadiləsi aparılıb. Qarşıda duran vəzifələr və mövcud problemlər müzakirə olunub.