Ötən ilin 15 dekabr tarixindən şəxsiyyət vəsiqəsinin itirilməsinə və korlanmasına görə rüsumlar artırıldı. Qanun yanvar ayının 1-dən etibarən qüvvəyə minib. Lakin maraqlıdır ki, bir çoxları pasportların verilməsi ilə bağlı qanunvericilikdə ödənişlər hissəsində edilən dəyişiklikləri tam olaraq anlamayıb. Elə bu səbəbdən də əksəriyyət itirilmiş və ya korlanmış pasportun yenilənməsinin əvvəlki qaydadakından daha baha başa gəldiyini düşünür.
Baş Pasport, Qeydiyyat və Miqrasiya İdarəsinin Pasport İdarəsinin rəis müavini, polis polkovnik-leytenantı Nərgiz Məhərrəmova qurumun saytına verdiyi geniş müsahibədə vətəndaşlar arasında çaşqınlıq yaradan bu məsələyə aydınlıq gətirib.
Polis polkovnik-leytenantı N.Məhərrəmova bildirib ki, cərimə 10 manat artırılsa da, vətəndaş itirdiyi pasportunu yeniləmək üçün daha az pul ödəyəcək. Yəni əvvəl itirilmiş pasportun yenilənməsi 70 manata başa gəlirdisə, indi bu proses 50 manata başa gəlir:
"Vətəndaş pasportu itirdiyi üçün 10 günə yenisini almaq istəyir. Əvvəlki halda 40 manat rüsum, 30 manat da cərimə ödəməliydi. Bu da 70 manat təşkil edəcəkdi. İndi isə cəmi 50 manat rüsum ödəməlidir. Qanunvericilikdəki bu dəyişiklik vətəndaşların xeyrinədir. Yəni, vətəndaş 20 manat az ödəməklə yeni pasportuna qovuşa bilər.
Ümumvətəndaş pasportu itərsə və ya korlanarsa, cərimə ödənilmir artıq. Bunun əvəzinə dövlət rüsumu 10 manat çoxalıb. Əvvəl vətəndaş 30 manat cərimə ödəməli idi. Bunun üçün inzibati qaydada protokol tərtib olunurdu. Lakin bu ilin yanvar ayının birindən bu qayda aradan qaldırıldı”.
N.Məhərrəmova onu da əlavə edib ki, səyyar xidmətlər zamanı vətəndaşdan heç bir xidmət haqqı tələb olunmur:
"Vətəndaş yalnız dövlət rüsumu ödəməlidir”.(Axar.az)

Xəbərdən istifadə edərkən istinad etmək vacibdir.