"İlk növbədə qeyd edim ki, Sumqayıt-Abşeron Regional Təhsil İdarəsinin fəaliyyəti ölkənin təhsil siyasətinin praktik tətbiq olunduğu və nəticə yönümlü idarəetmənin formalaşdığı nümunəvi modellərdən biri kimi qiymətləndirilə bilər. Bu idarənin uğuru sistemli idarəetmə, müəllim resurslarının rasional bölgüsü, məktəb infrastrukturunun planlı yenilənməsi və təhsildə innovativ təşəbbüslərin reallaşdırılması ilə bağlıdır. Təhlil göstərir ki, idarənin fəaliyyəti təhsil sisteminin səmərəliliyini artırmaqla yanaşı, regionda sosial inkişafın da lokomotivinə çevrilib”.
Bunu Xeberle.com-a açıqlamasında təhsil eksperti Kamran Əsədov bildirib.
O qeyd edib ki, son 5 ildə Sumqayıt və Abşeron üzrə ümumtəhsil müəssisələrinin sayı 80-dən çox artıb, bu da əhalinin sürətli artımı və məktəblilərin sayının 100 min nəfəri keçməsi fonunda strateji addım idi: "Elm və Təhsil Nazirliyinin 2023–2027-ci illər üçün Təhsil Strategiyasında nəzərdə tutulan "məktəbə çıxışda bərabərlik və keyfiyyətli təhsil imkanlarının artırılması” məqsədi bu regionda real nəticələrlə müşahidə olunur. Xüsusilə Abşeronun Masazır, Xırdalan, Saray və Mehdiabad qəsəbələrində yeni məktəblərin istifadəyə verilməsi təhsilin əlçatanlığını yüksəldib. İdarə müasir dövrdə təhsilin idarəetməsini yalnız inzibati nəzarət kimi deyil, analitik təhlil və monitorinq üzərində qurur. "Ümumi təhsil haqqında” Qanunun 16-cı maddəsinə əsasən, təhsildə keyfiyyət göstəricilərinin monitorinqi regional idarələrin birbaşa vəzifəsidir. Sumqayıt-Abşeron Regional Təhsil İdarəsi bu istiqamətdə interaktiv hesabat sistemi, məktəb rəhbərlərinin illik fəaliyyət qiymətləndirilməsi, həmçinin tədris nəticələrinin təhlili kimi mexanizmləri tətbiq etməklə şəffaflığı təmin edib”.
Kamran Əsədovun sözlərinə görə, 2024-cü ildə sertifikasiyadan keçən müəllimlərin 70 faizdən çoxu yüksək nəticə göstərib: "Müəllim kadrlarının seçimi və ixtisasartırma prosesi də bu idarənin diqqət mərkəzindədir. Sertifikasiya imtahanlarının nəticələrinə baxdıqda, Sumqayıt-Abşeron regionunun orta bal göstəriciləri ölkə üzrə ən yüksək nəticələrdən biri olub. 2024-cü ildə sertifikasiyadan keçən müəllimlərin 70 faizdən çoxu yüksək nəticə göstərib ki, bu da idarənin müəllim inkişafına verdiyi prioritetin sübutudur. Eyni zamanda, idarə tərəfindən təşkil edilən mentorluq və "Müəllim klubları” təşəbbüsü müəllimlər arasında peşəkar təcrübə mübadiləsini gücləndirib. Müsbət tərəf ondan ibarətdir ki, idarə pedaqoji heyətin psixoloji hazırlığını və sosial rifahını da diqqətdə saxlayır. Məsələn, Sumqayıt şəhərində həyata keçirilən "Sağlam müəllim – sağlam məktəb” proqramı təhsil işçilərinin psixoloji dəstək və stresslə mübarizə bacarıqlarını artırıb. Bu təcrübə bir çox regionlarda tətbiq olunmur və Sumqayıt modelinin üstünlüyünü göstərir. Bununla yanaşı, mənfi tərəf kimi qeyd edilməlidir ki, bəzi məktəblərdə şagird sıxlığı hələ də normadan yüksəkdir. Xüsusilə 1-ci siniflərdə hər sinfə düşən şagird sayı 35–40 nəfərə qədər yüksəlir. Lakin Elm və Təhsil Nazirliyinin dəstəyi ilə yeni məktəblərin tikintisi və əlavə korpusların istifadəyə verilməsi bu problemin tədricən aradan qaldırılmasına yönəlib. Nazirliyin bu istiqamətdə ayırdığı investisiya siyasəti təhsil infrastrukturunun dayanıqlı inkişafına xidmət edir və bu, Sumqayıt-Abşeron regionunda artıq real nəticə verir.
Təhsil eksperti onu da qeyd edib ki, dünya təcrübəsi ilə müqayisədə, Sumqayıt-Abşeron modeli Polşanın Mazoviya bölgəsi və Türkiyənin Kocaeli şəhərində tətbiq olunan regional təhsil idarəçiliyi modelinə yaxındır: "Hər iki ölkədə olduğu kimi, burada da qərarların verilməsi mərkəzdən asılı olmadan, yerli ehtiyaclara əsaslanır. Bu çevik yanaşma məktəblərin özünütəşkil səviyyəsini artırır, təhsil innovasiyalarının tətbiqini sürətləndirir. İdarənin STEM və STEAM layihələrinə verdiyi dəstək regionu innovativ təhsilin aparıcı mərkəzinə çevirib. "Beyin Mərkəzi”, "STEAM festivalı”, "Rəqəmsal məktəb” layihələri təkcə Sumqayıtda deyil, ümumilikdə ölkədə təhsilin texnoloji modernləşməsi prosesinə mühüm töhfə verir. Elm və Təhsil Nazirliyinin bu təşəbbüsləri Sumqayıt-Abşeron idarəsi tərəfindən uğurla yerli səviyyədə tətbiq olunur və bu, mərkəzlə region arasında idarəetmə sinxronluğunun nümunəsidir. Hesab edirəm ki, Sumqayıt-Abşeron Regional Təhsil İdarəsi idarəetmədə analitik yanaşmanı, insan resurslarında keyfiyyət göstəricisini, təhsil infrastrukturu və innovasiya sahəsində modernizasiya prinsipini birləşdirərək ölkə üzrə effektiv model formalaşdırıb. Əgər digər regionlarda da bu idarənin təcrübəsi tətbiq olunsa, təhsil sistemində həm keyfiyyət, həm də bərabərlik prinsipi daha güclü təmin olunar. Bu, Elm və Təhsil Nazirliyinin düzgün regional idarəetmə siyasətinin, şəffaf mexanizmlərin və dayanıqlı islahat kursunun real nəticəsidir”.
Elşən YƏHYAYEV,
Xeberle.com
Xəbərdən istifadə edərkən istinad etmək vacibdir.
