ADTGT regionlarda erkən nikahlarla mübarizə istiqamətində geniş sosial fəaliyyətlərə başlayır.
Azərbaycan Demokratik Tələbə Gənclər Təşkilatı (ADTGT) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Yeniyetmə və gənclər arasında erkən nikahlara dair monitorinq və sorğunun keçirilməsi, geniş ictimaiyyətin iştirakı ilə sosial aksiyaların təşkili, sosial çarxların hazırlanması və ictimai yayımının həyata keçirilməsi” adlı layihənin icrasına başlamışdır. Geniş maarifləndirmə, interaktiv sosial fəaliyyətlər, foks qruplarına yönəlik sosial reklam və PR xarakterli aksiyalarla həyata keçiriləcək layihə Beyləqan, Masallı, Qobustan və Şabran rayonlarını əhatə edəcəkdir.
Cari ilin aprelin 20-dən start götürən və 4 (dörd) ay davam edəcək layihə fəaliyyətlərinə ilk olaraq yuxarıda qeyd olunan regionlarda erkən nikahların real vəziyyətinə və obyektiv mənzərəsinə aid ictimai monitorinq və sosioloji sorğuların aparılması, gənc könüllü fəalların iştirakı ilə interaktiv sosial aksiyaların təşkili, bölgələrdə aidiyyətli yerli hakimiyyət strukturları təmsilçilərinin, təhsil, səhiyyə, gənclər, ədliyyə, hüquq-mühafizə orqanları və fəal ictimaiyyət nümayəndələrinin, ailə, ağsaqqal və din institutu üzvlərinin, KİV, digər qurum və ictimai fəalların iştirakı ilə məlumatlandırıcı, təbliğati, qınaq xarakterli seminarların keçirilməsi, mövcud auditoriyaya təsir edən sosial çarxların çəkilməsi, yayımı və sosial şəbəkələrdə, KİV və sosial mediada xüsusi PR kampaniyalarının aparılması və virtual ictimai debatların təşkili daxildir.
Layihə çərçivəsində zəngin bilgi və hüquqi informasiyaların əks olacağı "Erkən nikahlar: ictimai qınaq və maarifləndirmə” adlı kitabçanın nəşri və yayıımı da həyata keçiriləcəkdir. Layihə fəaliyyətinin bütün mərhələlərində əldə olunan nəticələr və bu sahədə mövcud problemin həllinə yönəlik təkliflər paket olaraq müvafiq dövlət qurumlarına təqdim olunacaqdır.
Layihənin məqsədi regionlarda yeniyetmə və gənc qızlar və oğlanlar arasında erkən nikahların yayılmasına "YOX” demək, onların özlərini və valideynlərini bu cür zərərli addımlardan çəkindirmək, bölgələrdə müxtəlif strukturların iştirakı ilə ictimai qınaq, ictimai maarifləndirmə kampaniyasına və digər sosial aksiyalara başlamaqdır. Layihənin digər məqsədlərindən biri də bölgələrdə yeniyetmə qız və oğlanlar arasında təhsilə və peşə vərdişlərinə maraq və motivasiya yaratmaqdır.
ADTGT ictimai əlaqələr
və informasiya departamenti
Xəbərdən istifadə edərkən istinad etmək vacibdir.