Görmə zəifliyindən əziyyət çəkən insanlarınilk olaraq müraciət etdikləri şəxs
oftolmoloq olur. O da çox vaxt sözügedən insanların gözlərindəki zəiflik dərəcəsini
müəyyən edərək, onlara müvafiq eynək
almaları üçün məsləhət verir. Lakin hazırda bu prosesi yalnız göz həkimləri
deyil, əczaxanaların ("Aptek”) nəzdində yerləşən optikalarda eynək satışı ilə məşğul olan əczaçılar,
sıravi şəxslər də həyata keçirirlər. Həmin şəxslər tərəfindən bəzən vətəndaşa
düzgün diaqnoz qoyulmaması halları onun yanlış eynək alıb istifadə etmək məcburiyyətində
qalmasına səbəb olur. Bu da çox vaxt istehlakçıların narazılığı ilə nəticələnir.
Bəs "Aptek”lərin nəzdində yerləşən optikalarda əczaçılar və digər şəxslər
tərəfindən, həkim rəyi olmadan gözün zəiflik dərəcəsinin müəyyən edilməsi nə dərəcədə
doğrudur?
Xeberle.com-a bu barədə açıqlama verən
oftolmoloq Elman Əliyev bildirdi ki, bu hal tam və ciddi qanun pozuntusudur: "Bütün
dünya ölkələrində eynəyin təyin olunması ixtisaslaşmış tibb müəssisələrində
aparılır. Yəni eynək təyini "Aptek” nəzdində olan optikalarda aparılmamalıdır.
Optikanın funksiyası həkim tərəfindən təyin olunan eynəyin hazırlanıb xəstəyə təqdim
edilməsidir. Mən də belə halların şahidi oluram və bu, məni çox qıcıqlandırır.
Çünki belə olduğu təqdirdə xəstələr müxtəlif şikayətlərlə, fəsadlarla bizə
müraciət edirlər. "Aptek”də həkim oturmamalıdır, onun yeri müalicə müəssisəsidir.
Yəni o, klinikada, xəstəxanada, poliklinikada oturmalıdır. Onun "Aptek”in nəzdində
fəaliyyət göstərən optikada əyləşərək xəstəyə eynək təyin etməsi üçün mütləq şəkildə
Səhiyyə Nazirliyi tərəfindən müvafiq
icazə olmalıdır. "Aptek”lərdəki optikalarda əyləşənlərə mən çox vaxt fikir
verirəm ki, heç həkim də deyillər. Cavan xanımlar gözün sındırma dərəcəsini müəyyən
edən aparatın - refraktometrin göstəriciləri əsasında xəstələrə eynək təyin
edirlər. Çünki refroktometr avtomatik
rejim vasitəsilə xəstənin göz ölçülərini müəyyən edir. Həmin göz ölçülərini xəstəyə
uyğunlaşdırmaq lazımdır. Bu prosesin həyata keçirilməsi isə həkimin
funksiyasıdır. Onun başqa heç kim həyata keçirməməlidir. Orada xəstənin yaşından
tutmuş gözün vəziyyətinə qədər bütün nüanslar nəzərə alınmalı və subyektivləşdirilməlidir.
Belə olmadıqda xəstə həmin eynəyi taxarkən müəyyən diskomfort hallarla
qarşılaşır. Xəstəyə eynək təyini müalicə prosesinin bir hissəsidir. Müalicə
prosesi isə lisenziyalaşdırılmış müəssisələrdə və ya xəstəxanalarda,
poliklinikalarda aparıla bilər. Ona görə də qeyd olunan hal tam və ciddi qanun
pozuntusudur”.
"Azad İstehlakçılar Birliyi”nin sədri
Eyyub Hüseynov isə bu sahədə ciddi problemlərin
olduğunu deyir: " Bəli, bu sahədə problemlər var. Bizə bu barədə təxminən 8 il əvvəl
belə bir müraciət də olmuşdu. Deməli, xanımın xaricdə yaşayan qızı əczaçının təyinatı
ilə ona bahalı bir eynək alaraq yaşadığı ölkəyə geri qayıtmışdı. Xanım deyirdi
ki, eynəyi gözümə taxdığım vaxt bir addım atıram, beş addım məndən qabağa
gedir. Sübut da edə bilmirəm ki, bu düzgün təyin olunmayıb, deyir öyrəşəcəksən.
Görünür, eynək bahalı olduğu üçün əczaçı xanımı əldən buraxmaq istəməyib. Biz
çox çətinliklə həmin insanın hüquqlarını müdafiə edə bildik. Mən düşünürəm ki,
belə primitiv üsullarla insanların gözünəeynək təyin etmək əslində onları korluğa aparır. Orta yaş həddini keçən
bir adam kimi hamıya məsləhət vermək istəyirəm ki, gözlərini eynəyə öyrəşdirməsinlər”.
Elnarə Salamova
Xeberle.com
Xəbərdən istifadə edərkən istinad etmək vacibdir.