"Normativ hüquqi aktlar haqqında" Azərbaycan Respublikasının Konstitusiya Qanununda dəyişiklik edilib.
Qanun layihəsi barədə millət vəkili Əli Hüseynli məlumat verib. Millət vəkilinin sözlərinə görə, dəyişiklik edilən qanun Ələt iqtisadi zona haqqında qanun layihəsinə uyğunlaşdırma xarakteri daşıyır.
"Dəyişikliyə əsasən, Ələt azad iqtisadi zonasının ərazisində "Ələt azad iqtisadi zonası haqqında" Azərbaycan Respublikasının Qanunu ilə müəyyən edilmiş hallarda bu Konstitusiya Qanunundan fərqli hüquqi tənzimləmə tətbiq edilir və həmin zonanın fəaliyyəti ilə bağlı qəbul edilmiş aktlar azad zona daxilində məcburi hüquqi qüvvəyə malikdir. Bu məsələ ilə bağlı komitədə geniş müzakirələr aparılıb. Qanunun konstitusiyaya uyğunluğu ilə bağlı fəqli fikirlər də səsləndirilib. Lakin ümumi qənaətə görə bu qanun konstitusiyaya tam uyğundur və bu qanun Azərbaycan Respublikası vətəndaşlarının hüquqlarını pozmur”.
Millət vəkili Qüdrət Həsənquliyev Ələt iqtisadi zonası haqqında qanunu alqışladığını, lakin bu qanunun bəzi maddələri Konstitutisiya ilə ziddiyyət təşkil etdiyini bildirib:
"Bu gün Konstitusiya qanununa düzəliş etməklə azad iqtisadi zonanın özünün qaydalar müəyyən etməsinə imkan veririk. Ekologiya, əmək mübahisələrinin həlli ilə bağlı mövcud qanunvericilikdə nə çatışmır, nələr beynəlxalq tələblərə uyğun deyil? Hansı uyğunsuzluq varsa, təklif etsinlər, qanunlara həmin dəyişikliyi edək. Milli Məclisin həll etdiyi məsələləri ayrıca quruma vermək doğru deyil. Azad iqtisadi zonanın təklif etdiyi qaydaları biz Milli Məclisdə də təsdiq edə bilərik. Hesab edirəm ki, çıxış yolu budur. Bütün dünyada azad iqtisadi zonalar vergi güzəştləri, gömrük rüsumlarından azad edilir. Amma ümumi müəyyən edilən qaydalar, əmək hüquqları, ekologiya ilə bağlı digər güzəştlər nəzərdə tutula bilməz”.
Qanun layihəsinə edilən dəyişiklik səsə qoyularaq qəbul edilib. (Axar.az)
Xəbərdən istifadə edərkən istinad etmək vacibdir.