Sumqayıt Bələdiyyəsinin yeni binasının açılışı olub. Şəhərin Nizami küçəsində yerləşən binada 2000-ci ilin sentyabr ayına qədər Sumqayıt Bələdiyyəsi yerləşib. Daha sonra isə bina Yeni Azərbaycan Partiyasının Sumqayıt təşkilatının inzibati binası olub. Ötən il Yeni Azərbaycan Partiyasının Sumqayıt təşkilatı müasir standartlara cavab verən yeni inzibati binaya köçdükdən sonra Bələdiyyənin şəhərin mərkəzində yerləşən əvvəlki binasına köçürülməsi barədə qərar qəbul edilib. Bina əsaslı şəkildə, tamamilə yenidən qurulub. Daha öncə qəzalı vəziyyətdə olan binada mütəxəssislərin iştirakı ilə baxış və təhlil aparıldıqdan sonra bərkitmə və əsaslı yenidənqurma işlərinə başlanılıb. Daxili konstruksiyalar, istilik, işıq, su xətləri yenilənib.  

Binada 36 iş otağı qurulub, bələdiyyə əməkdaşlarının səmərəli fəaliyyəti üçün hər cür şərait yaradılıb. Bələdiyyə üzvləri və əməkdaşlarının iştirakı ilə keçirilən toplantıda isə Sumqayıt şəhər Bələdiyyəsinin fəaliyyəti barədə məlumat verilib.

Sonda bələdiyyənin icra aparatının bir qrup əməkdaşı şəhərin sosial-iqtisadi həyatında səmərəli fəaliyyətinə görə fəxri fərmanla təltif ediliblər.