Lerik rayonunun Qosmalian kəndində "Qafqaz bəbirlərinin mühafizəsi” layihəsi çərçivəsində IDEA İctimai Birliyi, Azərbaycan Respublikasının Gənclər Fondu, Təhsil Nazirliyi və Ümumdünya Vəhşi Təbiətin Mühafizəsi Fondunun (WWF) Azərbaycan nümayəndəliyinin təşkilatçılığı, Lerik Rayon İcra Hakimiyyətinin dəstəyi ilə keçirilən "Bəbirləri mühafizə edək!” adlı növbəti ekoloji yay düşərgəsi başa çatıb.
Xeberle.com-un verdiyi məlumata görə, AZƏRTAC-ın bölgə müxbiri xəbər verir ki, üç gün davam edən düşərgədə Lerik rayonunun Hamarmeşə, Günəşli, Qosmalian, Çayrud, Vistən, Nuravud və digər kəndlərindən 60-a yaxın məktəbli iştirak edib.
"Bəbirləri mühafizə edək!” yay düşərgəsinin əsas məqsədi Qafqaz bəbirinin məskunlaşdığı təbii areallara yaxın yerlərdə yaşayan gənclərin bu nadir növ haqqında məlumatlandırılması və onun mühafizəsi işinin təbliği, onların məktəb yaşlarından ətraf mühit sahəsində maarifləndirilməsi, təbiətə qarşı rəğbət və qayğı hissinin formalaşdırılmasıdır.
Ekoloji yay düşərgənin ikinci günü məktəblilər üçün Zuvand Dövlət Təbiət Yasaqlığına və Günəşli şəlaləsinə ekskursiyası təşkil olunub. Ekskursiya zamanı uşaqlar təmizlik aksiyasında iştirak edərək tullantıları toplayaraq çeşidləyiblər.
Daha sonra gənclər heyvan izlərinin və bitki növlərinin təyin edilməsi ilə bağlı praktiki işlərə qoşulublar.
Düşərgənin üçüncü günü məktəblilər təbiət fotoqrafı və rejissoru Adrian Stern tərəfindən çəkilən "Dünyanın ən çox axtarılan bəbiri” sənədli filminə baxıblar.
Daha sonra "Bəbirləri qoruyaq!” adlı ekoloji oyun keçirilib. Oyun zamanı iştirakçılar komandalara bölünərək bəbirlərin qanunsuz ovlanmadan xilas edilməsi yollarını tapmağa çalışıblar.
Düşərgənin sonunda iştirakçılara sertifikatlar və xatirə hədiyyələri təqdim edilib.
Qeyd edək ki, "Qafqaz bəbirlərinin mühafizəsi” layihəsi IDEA İctimai Birliyi, Ekologiya və Təbii Sərvətlər Nazirliyi və WWF Azərbaycan nümayəndəliyinin birgə əməkdaşlığı çərçivəsində həyata keçirilir. Layihə Qafqaz bəbirlərinin populyasiyasının bərpası və mühafizəsinə yönəlsə də, onun əsas istiqamətlərindən biri də ictimaiyyət arasında maarifləndirmənin artırılmasıdır. Bu məqsədlə məktəblilər üçün təşkil edilən bu cür yay düşərgələri mühüm əhəmiyyət kəsb edir.
IDEA İctimai Birliyinin təşəbbüsü ilə ətraf mühit və biomüxtəliflik mövzusunda düşərgələr 2014-cü ildən etibarən hər il təşkil edilir. Bu müddət ərzində düşərgələrdə Salyan, Neftçala, Goranboy, Samux, Qax, Şəki, Masallı, Cəlilabad, Yardımlı, Lənkəran, Astara, Göygöl, Lerik rayonlarından ümumilikdə 400-ə yaxın məktəbli iştirak edib.
Xəbərdən istifadə edərkən istinad etmək vacibdir.
