Ötən günlər su olmayan ərazilərin böyük bir hissəsi içməli su ilə təmin edilib, ancaq problemli ərazilər var. Əhalinin fasiləsiz su ilə təmin edilməsi istiqamətində tədbirlər davam etdirilir.
Xeberle.com Publika.az-a istinadən xəbər verir ki, bu barədə "Azərsu" Açıq Səhmdar Cəmiyyətinin mətbuat xidmətinin rəhbəri Anar Cəbrayıllı məlumat verib.
Onun sözlərinə görə, paytaxtda bu gün axşam saatlarından su təchizatında problem olan ərazilərdə suyun verilişi bərpa ediləcək:
"Hazırda su anbarların ehtiyatımızın 70-75 faizi yığılıb. Amma yenə də çatışmazlıq var. Köhnə Günəşli və Yeni Günəşli qəsəbələrinin bəzi yerlərində su problemi var idi. Bu gün Mehmandarov, Şıxlinski, İnqlab İsmayılov küçələrinin su ilə təmin olunması üçün anbarlara su vurulub. Yaxın dəqiqələrdə həmin ərazilərə su veriləcək. Zabrat qəsəbəsinin bir hissəsi su ilə təmin olunsa da, bir hissəsində problem var. Bu gün axşam saatlarında həmin əraziyə də su veriləcək. Zabrat və Saray qəsəbələrinin bir hisasəsinə, Hövsanın qəsəbə ərazisinə su verilib, ancaq kənd Hövsan ərazisində su ilə təminatda problem var. Axşam saatlarında problem həllini tapacaq. Suraxanı rayonu Qum adası, Zığ qəsəbəsində də problemlər var. Həmin ərazini bu gün su ilə təmin etməyə çalışacağıq. Zabrat, Sabunçu, Əmircan, Bülbülə və Saray qəsəbəsinin də qalan hissəsi su ilə təmin olunacaq".
Xəbərdən istifadə edərkən istinad etmək vacibdir.
