İyulun 17-si əfsanəvi «Monitor» jurnalının baş redaktoru Elmar Hüseynovun doğum günüdür, bu gün onun 51 yaşı tamam olur.
Elmar Hüseynov 2005-ci il martın 2-də Bakının mərkəzində yaşadığı evin qarşısında Gürcüstandan olan muzdlu qatil tərəfindən odlu silahdan açılan 7 güllə ilə qətlə yetirilib.
Elmar Hüseynov 17 iyul 1967-ci ildə Bakıda anadan olmuşdu. O, 1992-ci ildə Azərbaycan Mühəndis-İnşaatçılar İnstitutunu mühəndis-hidrotexnik ixtisası üzrə bitirmişdi. Bir müddət Xudafərin SES-də və Rusiyada Boquçan SES-də ixtisası üzrə çalışmışdı.
Elmar Hüseynov 1995-ci ildən etibarən jurnalist fəaliyyətinə başlamışdı. Həmin ildə də «Trend» analitik-informasiya agentliyini, 1996-cı ildə isə «Monitor» jurnalını təsis etmişdi.
O, həmçinin «Bakinski bulvar», «Bakinskiye vedomosti» qəzetlərinin təsisçisi idi.
Ölümündən sonra jurnalistin həyat yoldaşı Rüşanə Hüseynova və azyaşlı oğlu Aslan qalıb. Atası qətlə yetiriləndə Aslan 1 yaş, 4 aylıq idi.


(virtual.org)