Biz dağçı deyilik. Baxmayaraq ki, ölkə əsas etibarilə dağlarla əhatə
olunub, amma alpinizmin az inkişaf etdiyi ölkələrdən biriyik. Görünür,
dağçıların sevdiyi ibarə ilə desək, "fəth etməyi” sevmirik. Əsrlər boyu fəth olunmuşuq,
müdafiədə oynamışıq, "ən yaxşı müdafiə hücümdur” tezisini unutmuşuq... Dağlara
qalxmaq da hücuma keçmək qədər əziyyətlidir axı... Ona görə də daha çox Arana və
dağətəyinə bağlı qalmışıq...
Amma dağlara qalxmaq lazımdır. Birincisi, çünki onlar bizim
dağlardır, onları biz fəth etməliyik, ikincisi, bu, bir idman və turizm
növüdür.
...və heç bir əlaqəsi olmadan, sadəcə, dağ adamları da, dağa qalxanlar da saf
olur... təbiətin saflığı tədricən sanki çökür bu insanların içinə.
Azərbaycanda alpinizmin böyük tarixindən danışa bilmərik. Yalnız son
illərdə bu sahədə nailiyyətlər, irəliləyişlər nəzərə çarpıb. Bu mənada Azərbaycan
Hava Və Ekstremal İdman Növləri Federasiyasının səylərini qiymətləndirməmək
olmaz. Keçmiş Ekologiya və Təbii Sərvətlər naziri Hüseyn Bağırov tərəfindən
yaradılmış Federasiya bu sahənin inkişafına müyyən töhvələr verdi. Keşmiş
nazirin özünün də gənclərlə bərabər dağlara qalxdığını bilirik. İlk Azərbaycan-Antarktida
ekspedisiyasının təşkili də Azərbaycan Alpinizminin tarixində qalacaq hadisələrdəndir.
2009-cu ilin yanvarında Azərbaycan bayrağı ilk dəfə Antarktida ərazisindəVinson
dağına sancılmış, beləliklə Azərbaycan ekspedisiyası islam, türk və MDB ölkələrindən
Cənub qütbünə piyada çatan ilk qrup kimi tarixə düşmüşdür.
Doğrudur, artıq keçmiş nazir bu federasiyaya rəhbərlik etmir, ancaq
onun ölkədə alpinizm ənənələrinin formalaşmasında əhəmiyyətli rolu danılmazdır.
Bir neçə gün öncə Azərbaycan Turizm Assosiasiyasının başçısı Nahid Bağırovun
açıqlamasını oxudum. Açıqlamada deyilirdi: "Azərbaycanda indiyə qədər ekstremal
dağ turizminin inkişaf etməməsində Ekologiya Nazirliyinin əvvəlki rəhbərliyi
günahkardır. Dünyanın heç yerində turizmin bu növü üçün icazə sənədləri tələb
olunmur, yalnız Ekologiya Nazirliyinin əvvəlki rəhbərliyi belə nou-hau tətbiq
etmişdi. İndi biz qurumun yeni rəhbərliyi ilə bu məsələni yoluna qoymaq üçün
işləyirik. Avropada özümüzü reklam imkanlarından da istifadə etməyə
başlayacağıq”.
Keçmiş nazirin maraqlı cavabı da özünü çox gözlətmədi: "Mən Azərbaycan Turizm
Assosiasiyasının başçısı Nahid Bağırovu səmimi olmağa çağırıram. Azərbaycanda
alpinizmlə məşğul olmağa heç bir məhdudiyyət qoyulmayıb. Üç alpinistin həlak
olmasından sonra alpinizmlə məşğul olmağa məhdudiyyətlərin olmamasından gileylənənlərdən
biri Nahid Bağırov özü idi.
Hazırda dağlara qalxmaq üçün Dövlət Sərhəd Xidmətinin icazəsi tələb
olunur. Gəlin inanaq ki, Nahid Bağırovun cəhdləri sayəsində indi bu prosedur ləğv
ediləcək və biz bu münasibətlə onu təbrik edəcəyik”.
İndi gənclərlə dağlara qalxan, özü gəncləri bu sahəyə dartıb gətirən,
bu sahənin inkişafı üçün cəhdlər göstərmiş adamı QHT rəhbərinin dağçılıq
turizminin inkişafına mane törətməkdə ittiham etməsi, zənnimcə, ədalətli,
görünmür. Nə isə... Mövzumuz da heç bu, deyil...
...Biz dağlara hansısa məhdudiyyətlər var deyə
maraq göstərmirik?! Yox! Sadəcə, içimizdə entusiazm yoxdur! Alpinizm bir mədəniyyət,
ənənə kimi bizdə yetərincə formalaşmayıb. Ancaq tamamilə yox da deyil. Əgər
Antarktidaya qədər gedib çıxmışıqsa, beynəlxalq yarışlara qatılırıqsa, beynəlxalq
turnirlərə evsahibliyi etmişiksə, deməli, davamını gətirmək olar. FAİREX-in bu
sahədə peşəkar məşqçiləri, dağçıları, xilasediciləri var. Sadəcə, indi ikinci nəfəs
açılmalıdır... Bu, bizə dağçılıq turizminin inkişafı baxımından da dividentlər
qazandıra bilər. Ramil Zeynallı
Xəbərdən istifadə edərkən istinad etmək vacibdir.