Yaralı vəziyyətdə pasportları alınıb, ac-susuz saxlanırlar...
Avqustun 11-də Tiflisdə azərbaycanlıların da olduğu mikroavtobus qəzaya uğrayıb. Nəticədə mikroavtobusda ikisi Gürcüstan vətəndaşı, - aralarında azyaşlı uşaq da var, - beş Azərbaycan vətəndaşı ağır xəsarətlər alıb.
Xeberle.com xəbər verir ki,bu barədə "Yeni Müsavat”a qəzada xəsarət almış vətəndaşlarımızdan biri - 49 yaşlı Dürdanə Eminbəyli məlumat verib. Onun sözlərinə görə, xəsarət alan azərbaycanlı vətəndaşların pasportları hər hansı izahat verilmədən polis tərəfindən alınıb, özləri isə artıq iki gündür ki, Tiflis xəstəxanasında heç bir yardım almadan ac-susuz, yaralı vəziyyətdə qalıblar: "Mən Eminbəyli Dürdanə İkram qızı, 16-18 yaşlı qızlarım Radiyə və Səadət Cəfərovalar, 65 yaşlı bibim qızı Kəmalə Əliyeva və onun az aşlı oğlu Vüsal Quliyev Türkiyəyə istirahətə getmişdik. Avqustun 11-də, təxminən gecə saat 11 radələrində Türkiyənin Sarp gömrükündən keçib Tiflisə gedərkən yolda qəzaya uğradıq. Belə ki, arxadan gələn avtomobil bizim mikroavtobusa çırpıldı. Nəticədə mikroavtobus 3 dəfə aşdı və biz ağır xəsarətlər aldıq. Bizimlə bərabər 2 gürcüstanlı vətəndaş da xəsarət aldı. Lakin ən ağır xəsarətləri mən aldım. Belə ki, mənim dizim qırılıb, vətərlərim qopub, barmaqlarımın hamısı qırılıb. Qızım Radiyənin dirsəkdən yuxarı qolu qırılıb, mikroavtobusun şüşələri üz-gözünü kəsib. Digərlərinin vəziyyəti haqqında mənə hələ ki, məlumat verilməyib. Ümumiyyətlə, bir-birimizlə əlaqə saxlamağa icazə verilmir. Pasportlarımız polis tərəfindən alınıb, bizə geri qaytarılmır. Artıq iki gündür burada xəstəxanadayıq, bizə nə yemək-su verən, nə də yardım edən, yaxınlaşan tapılmır. Qızım Radiyə bir tikə çörək üçün, acından zarıyır. İlkin tibbi yardım kimi, sadəcə, yaralarımız sarınıb, müalicə üçün isə bizdən 6 min lari, təxminən 3 min manat pul istəyirlər. Buna isə imkanımız yoxdur ”.
Şikayətçinin sözlərinə görə, vəziyyətlə bağlı Azərbaycanın Gürcüstandakı səfirliyinə müraciət etsələr də bir nəticəsi olmayıb: "Səfirlikdən gəlib vəziyyətimizi gördülər. Lakin bildirdilər ki, "öz hesabınıza məsələni həll edin, sizə yardım etmək imkanımız yoxdur”. Pasportlarımızı özümüzə versələr, birtəhər sürünə-sürünə ölkəmizə gəlib çatarıq. Aidiyyəti qurumlardan xahiş edirəm, bu məsələdə bizə köməklik etsinlər. Yad ölkədə azyaşlı, yeniyetmə uşaqlarla birgə çıxılmaz vəziyyətdə qalmışıq”.
Məsələ ilə bağlı "Yeni Müsavat”ın əməkdşaı kimi bir neçə dəfə Azərbaycanın Gürcüstandakı səfirliyi ilə əlaqə yaratmağa çalışdıq. Lakin telefon zənglərimiz cavabsız qaldı.
Xəbərdən istifadə edərkən istinad etmək vacibdir.