Xeberle.com xəbər verir ki, bu dəfə Sumqayıt Gənclər Evinin konfrans zalında mövzu ilə bağlı müzakirələr aparılıb, qarşıya qoyulmuş məsələlərlə bağlı təklif və tövsiyələr səsləndirilib. Tədbirdə son illərdə şəhər icra hakimiyyətinin başçısı Zakir Fərəcovun rəhbərliyi ilə şəhərdə aparılan yenidənqurma, abadlıq və iri infrastruktur layihələri barədə məlumat verilib. "Sumqayıt doğma evimizdir, onu daha da müasir şəhərə çevirmək hər birimizin borcudur” devizi ilə şəhər ictimaiyyəti ilə silsilə görüşlərin keçirildiyini və mövcud problemlərin aşkarlanması, təhlili və həlli baxımından bu görüşlərin əhəmiyyətli olduğunu vurğulanıb. Çıxışlarda abadlaşdırılmış ərazilərdə qurulmuş infrastrukturun qorunub-saxlanmasında şəhər ictimaiyyətinin dəstəyinin vacib olduğu qeyd edilib. Bildirilib ki, son 3 il ərzində şəhərdə dənizkənarı bulvar, Heydər Əliyev Mərkəzi, Şahmat və İncəsənət Məktəbi, Yeni Azərbaycan Partiyasının inzibati binası, Bayraq Muzeyi istifadəyə verilib, Dram Teatrı və Kimyaçılar Sarayı yenidən qurulub. Vurğulanıb ki, bu dövr ərzində Sumqayıtın mikrorayon və məhəllələr ərazisində 27 abad məhəllə yaradılıb, 305 lift yenisi ilə əvəz olunub, 80 binanın fasadı əsaslı şəkildə təmir edilib, 550 yaşayış binasının dam örtüyü tamamilə yenilənib. Sumqayıt həm də sənaye şəhəri kimi güclənir. Bu illər ərzində şəhərdə xeyli sayda sənaye-istehsal müəssisələri fəaliyyətə başlayıb, nəticədə minlərlə iş yerləri açılıb. Sonda tədbir iştirakçılarını maraqlandıran suallar cavablandırılıb.