Bu gün Apelyasiya Məhkəməsində sabiq səhiyyə naziri Əli
İnsanovun şikayətinə baxılıb.
Virtualaz.org saytının məhkəmə prosesində iştirak edən əməkdaşı
xəbər verir ki, Əli İnsanov məhkəmə zalında ötən dəfə olduğu kimi bu dəfə də
şüşə qəfəs arxasında əyləşdirilib.
Əli İnsanov prosesdəki çıxışı zamanı deyib ki, hakimiyyət əli-qolu
bağlı insandan da qorxur. Sabiq nazirin çıxışı zamanı mikrofonun səsi
azaldılıb, nəticədə onu eşitmək mümkün olmayıb.
Prosesdə 8 şahid dindirilib. Hesablama Palatasının, Əmlak Məsələləri
Dövlət Komitəsinin və Maliyyə Nazirliyinin işçiləri prosesdə şahid qismində
ifadə veriblər.
Ə.İnsanovun vəkili isə səhiyyə naziri Oqtay Şirəliyevin və
Əmlak Məsələləri Dövlət Komitəsinin sədri Kərəm Həsənovun məhkəməyə çağırılması
ilə bağlı vəsatət qaldırıb. Hakim vəsatətləri təmin etməyib.
Ə.İnsanov isə bildirib ki, onu öldürməyə çalışırlar: “Mən nə
dövlət çevrilişinə cəhd etməmişəm, nə də korrupsiya ilə məşğul olmamışam.
Bunların hamısı qondarma ittihamlardır”.
Məhkəmə prosesi fevralın 14-dək təxirə salınıb.
Xəbərdən istifadə edərkən istinad etmək vacibdir.